Тораптық жарыс өтті
"Қазақстан теміржолшысы" газетінің Жамбыл облысындағы меншікті тілшісі
Жамбыл бөлімшесінің кәсіподақ ұйымы Наурызнама онкүндігі аясында теміржолшылар арасында тораптық жарыстар өткізді. Тараз станциясында спорттың үш түрі бойынша ұйымдастырылған жарыс өте жоғары деңгейде өтті және қатысушылар қатары да көп болды.
Шахмат пен үстел теннисінен бәсеке әрқашан жоғары. Кір тасын көтерушілердің бәсі одан да асып түсіп, жанкүйерлері де көп болды.
Шахмат сайысы бойынша турнирде жүлделі үш орынды ЭЧ-23 электрмен жабдықтау дистанциясының аға энергодиспетчері Жарас Тұрарбек, ТЧЭ-31 Жамбыл локомотив пайдалану депосының инженер-технологы Адылхан Бекбердиев және ЭЧ-21 дистанциясының өндірістік оқыту шебері Марат Құлбаев иеленді.
Бөлімшенің спорт нұсқаушысы Евгений Тян гир көтеруден ардагер теміржолшылар да бақ сынап, жарыс көрігін қыздыра түскенін айтады.
Соның бірі – Андрей Швалев қарсыласына аз ғана ұпаймен жол беріп, екінші орынды еншіледі. Оның есе жіберген спортшысы – ВП-35 қалпына келтіру пойызының жүргізушісі Гиас Абдрахманов жеңіс тұғырына көтерілді. Ал ВП-35 тракторшысы Асылбек Сәрсембаев үшінші орынды қанағат тұтты.
Үстел теннисінен өткен жарыста Жамбыл магистральдық желі бөлімшесінің қызметкері Райымбек Мамбетов жеңімпаз атанды. ТЧЭ-31 машинисі Әнуар Ақылбеков пен Ғалымжан Нұртаев 2 және 3 орындарды өзара бөлісті.
Жарыс жүлдегерлері грамоталармен, медальдармен және бағалы сыйлықтармен марапатталды.
