«Jibek Joly» туристік пойызы – Таразда
"Қазақстан теміржолшысы" газетінің Жамбыл облысындағы меншікті тілшісі
Үшінші рет саяхатқа шыққан «Jibek Joly» пойызының туристері Таразға аялдап, көне шаһардың тарихи-мәдени ескерткіштерімен танысты.
20-25 наурыз аралығында Алматы, Түркістан, Ташкент, Самарқанд бағытына саяхат жасайтын туристік маршрут бұл жолы кеңейтіліп, аялдамалар тізіміне Орталық Азияның ең көне қалаларының бірі Тараз қосылып отыр. Туристік пойыздың жолаушыларын Тараз вокзалында жамбылдықтар күтіп алып, жолаушыларға ыстық бауырсақ таратылып, саяхат сапарына сәттілік тілеген көңілмен шашу шашылды. Ұлт аспаптар ансамблі күмбірлетіп күй тартып, ән шырқады.
Жамбыл облысы әкімдігінің кәсіпкерлік және индустриалды-инновациялық дамыту басқармасының баспасөз қызметінің хабарлауынша, шаһарға келген туристер үшін арнайы қолөнершілердің жәрмеңкесі мен «Керуен шеруі» мәдени іс-шарасы ұйымдастырылды.
Ұлы Жібек жолы бойында жатқан көне Тараз қаласы екі жыл бұрын дүниежүзілік қолөнершілер қаласының тізіміне енгені мәлім. Сондықтан тараздық қолөнершілердің қолынан шыққан туындылар «Jibek Joly» туристік пойызы жолаушыларының қызығушылығын туғызғаны анық.
«Керуен шеруі» мәдени-тарихи экскурсиясында жолаушыларға Тараз қаласының бай тарихы мен мәдени мұрасы таныстырылды. «Тектұрмас» және «Көне Тараз» этномәдени-тарихи кешені, Қарахан кесенесі секілді шаһардағы маңызды тарихи ескерткіштерге барды.
