Түркістанға төрт жүз турист келді

Наурыз мейрамына «Жібек жолы» халықаралық пойызымен Түркістанға 400-ге жуық турист келді. Саяхатшылар Түркістан қаласының көрікті орындарын аралап, Наурыз мейрамын тойлады.

Түркі елдерінің ортақ мерекесі қарсаңында Түркістанда туристік маусым ресми түрде ашылғаны белгілі. Осыған орай халықаралық бағыттағы «Жібек жолы» пойызы жолға шығып, наурыз мейрамына орай Түркістанда аялдап, Түркі әлемінің рухани астанасы атанған қала тарихымен, мәдениетімен жақынырақ танысты. Арыстанбаб кесенесі мен Отырар қалашығын тамашалап, Қожа Яссауи кесенесіне зиярат етті.

«Жібек жолы» туристік пойызы өткен жылы өз жұмысын бастағандықтан, Түркістан вокзалында қызмет көрсету сапасы артып, ұйымдастыру жұмыстарын ширату шұғыл жолға қойылған. Түркістан вокзалы бастығының кезекші-көмекшісі Гүлжан Тұрғанбаеваның айтуынша, туристік бағыттағы екі пойыз вокзалға 21 және 22 күндері қатар келген. №933/34 және №921/22 нөмірлі пойызбен түркі астанасындағы Наурыз тойын тамашалау үшін 400-ге жуық жолаушы келген.

– Біздің міндетіміз қаламызға келген қонақтарға тиісті қызметтерді көрсете отырып, қауіпсіздікті қамтамасыз етіп күтіп алып, шығарып салу болып табылады. Сондықтан да біз осы күндері әдеттегі қызметімізді атқарып жүрсек те, айрықша сезіммен ақжарма көңілмен жолаушылардың келуін күттік, – дейді Гүлжан Иманқұлқызы.

Сол күнгі бірінші ауысымда вокзал кезекшісі Біләл Дәулет пен анықтама беру бойынша кезекші Дария Бейсенбай болған. Ал екінші ауысымда вокзал бастығының кезекші-көмекшісі Нұржан Жұмабаев пен Арман Мұқанов және Ақнұр Тұрсынқұлова қызмет көрсеткен. Жолаушылардың бәрі де діттеген жерге аман-есен жетіп, вокзал ғимаратында көрсетілген қызметтерді тиімді пайдаланып, сапарларын жалғастырған. Қызмет көрсету кезінде ешқандай тосын жайт пен оқыс оқиға тіркелмеген.