Жолаушы қызметінде – қырық жыл
Атырау облысы бойынша меншікті тілші
Бір салада қырық жыл еңбек етіп, зейнет жасына жету де адам баласы үшін зор абырой. Ал сүйікті жұмыспен айналысу – үлкен бақыт. Оның жарқын үлгісін бүгінгі кейіпкерімізден көрдік.
Болған Орынбаева сонау бір жылдары 18 жасында Атырау вокзалына жүк кассирі болып жұмысқа орналасқан кезін сағынышпен еске алды. Содан бері 43 жыл өтіпті. Бүгін міне зейнеткерлік жасқа жетіп, құрметті демалысқа шығып отыр.
«1982 жылы 2 қырқүйекте жұмысқа қабылдандым. Он сегіз жастағы қыз едім. Вокзал басшысы Светлана Губашева мені ұжыммен таныстырып, жүк кассасына отырғызды. Сол кездегі жетекші-ұстаздарым жүк кассирі Шара Қанатова, билет кассирі Балсұлу Омарова апаларымыз жұмыстың қыр-сырымен таныстырып, оқытты үйретті. Ол кезде компьютер жоқ, бәрін қолмен жазатынбыз. Осы қырық екі жылдан астам жұмыс өтілімнің ішінде билет кассирі, анықтама беру жөніндегі кезекші, хабарлаушы болып жұмыс істедім. Одан сатылған билеттердің есебін жасайтын қызметке ауыстым. Соңғы жылдары вокзал бастығының кезекші көмекшісі қызметін атқардым. Қырық жыл қалай өте шыққанын білмей де қалдым. Тату-тәтті ұжымда сүйікті жұмысыңды атқарған кезде көңіл-күйің де жоғары болады, уақыт та осылай жылдам өте шықса керек», – деді кейіпкеріміз.
Ұжымда сыйлы, іскер жан ретінде өз ісінің білікті маманы атанған Болған Амангелдіқызын вокзал ұжымы зор құрметпен зейнет демалысына шығарып салды. Атырау магистральдық желі бөлімшесінің бастығы Аралбай Қосымбаев вокзалға арнайы келіп құттықтап, гүл шоғын табыс етіп, оған зор денсаулық, отбасы бақытын тіледі және «Қазақстан теміржолына – 120 жыл» төсбелгісін кеудесіне тақты.
