Теміржолшылар Жеңіс күні бірлік пен рухты паш етті
Абай облысы бойынша меншікті тілші
Биыл Жеңістің 80 жылдық мерейтойы семейлік теміржолшылар үшін көптеген маңызды қоғамдық іс-шаралармен есте қалмақ. Бөлімшедегі салалық кәсіподақ ұйымының ұйытқы болуымен ұйымдастырылған барлық іс- шараларға, әсіресе өңірдегі жас буын теміржолшылар белсенді қатысты.
Желі бойындағы барлық тораптық станциялар мен деполар басшылары мен қызметкерлері тыл ардагерлерін арнайы құттықтап барып, сыйлықтар тарту етті. Сонымен қатар бөлімшеде ауған соғысының теміржолшы ардагерлерімен тағылымды кездесу өтіп, мерекелік дастархан да жайылды. Бүгінгі бейбіт күннің бағасы жайлы тағылымды әңгіме қозғалды.
Әйтсе де, ең негізгі шаралар қатары 9 мамыр күні ұйымдастырылды. Мәселен, бұл күні Семей ЖТ бөлімшесінің бастығы Алмас Сейсемқанов, «Қазкөліккәсіп» ҚБ Семей өңірі бойынша өкілі Есен Қажығұлов бастаған теміржолшылар қауымы шаһар орталығында өткен мерекелік салтанатты шараға қатысып, Жеңіс саябағындағы «мәңгілік алауға» гүл шоқтарын қойды.
Ал кешкісін ымырт үйіріле, теміржолшы жастар ұйымының төрайымы Арайлым Қосанова бастаған жас буын сала қызметкерлері «Жарқыра, Жеңіс шырағы» акциясына қатысып, мерекенің мәнін тереңнен сезінді.