Абай мұрасы – теміржолшылар назарында
Абай облысы бойынша меншікті тілші
Семей ЖТ бөлімшесі бойынша Абай хакімнің 180 жылдық мерейтойына орай мерекелік іс-шаралар легі ресми түрде басталды. Осыған орай бөлімшенің мәжіліс залында филиал директоры Алмас Сейсемқановтың қатысуымен танымдық-тағылымдық басқосу өтіп, онда алдағы уақыттағы атқарылуы тиіс жоспарлы шаралар қаралды.
Биылғы жаз Семей өңіріндегі теміржолшылар қауымы үшін рухани-мәдени іс-шараларға толы болмақ. Мәселен, осы аптада бөлімше басшысы Алмас Ғылымұлының бастамасымен Абайдың тағылымға толы өлеңдерін мәнерлеп оқудан челлендж басталды. Ұлы ақынның «Қайрат пен ақыл жол табар...» өлеңін нақышына келтіре оқуды филиал директоры өзі бастады. Аталмыш игі шараны қоғамдық жұмыстар бойынша жоғары белсенділігімен танылып жүрген Аягөз станциясының теміржолшылары бірден жалғастырып әкетті.
Бір бұл емес, семейлік теміржолшылар қауымы қаладағы және ақын өмірінің соңғы жылдары өткен Жидебайдағы қорық-мұражайға экскурсия жасауда. Мәселен, НОД-ЖТ қызметкерлері салалық кәсіподақ комитетінің төрайымы Айгүл Берікболованың ұйымдастыруымен ақын мұражайында болып, рухани танымдық саяхат жасады. Абай өмір сүрген дәуірге үңіліп, хакімнің өзі тұтынған заттарымен танысты. Сондай-ақ Абай шығармашылығы жайлы мол мағлұмат алды.
– Мұндай іс-шаралардың берері мол. Біріншіден, қызметкерлер арасында қазақ тілінің қолданыс аясын кеңейтсе, екіншіден, қазақтың бас ақынының өмірі жайлы толыққанды мәлімет ала алады. Сол тәрізді әрбір Абай елінің теміржолшысы ақынның ең кем дегенде бір өлеңін жатқа біліп, бір қара сөзінің мазмұнын айта алуы тиіс деген ұстанымға келіп отырмыз, – дейді Айгүл Мырзағалиқызы.