Болашақ станциясы арқылы Түрікменстанмен жүк алмасу тұрақты жалғасуда
«Қазақстан теміржолшысы» газетінің тілшісі
Маңғыстау жүк тасымалы бөлімшесінің шекаралық Болашақ станциясы арқылы Түрікменстан бағытына жүк тасымалы қалыпты жалғасын табуда.
Болашақ станциясының бастығы Мақсат Нұрбековтің айтуынша, биылғы өткен 5 айда аталған станциядан көрші елге 216 пойыз жөнелтілген, бұл дегеніңіз – 8 778 вагон, 478 591 тонна жүк. Керісінше Түрікменстаннан Қазақстанға 202 пойыз жүк қабылданған, бұл 9 609 вагон, яғни 154 078 тонна жүкті құрайды. Ал былтыр барлығы 498 пойыз жөнелтіліп, 504 пойыз қабылданыпты.
– Биылғы 5 ай мен өткен жылдың сәйкес кезеңін салыстырғанда қатты алшақтық байқалмайды. Өткен жылы 213 пойыз жіберіп, 212 пойыз қабылдап алыппыз. Жалпы тәулігіне 2 пойыз қабылдап, 2 пойыз жөнелтіп отырмыз, жылдың соңына дейін бұл көрсеткіш 5 пойызға дейін көбейеді деген болжам бар, бірақ нақты қашан екені белгісіз, – дейді станция бастығы.
Түрікменстаннан Қазақстанға импортталатын жүктердің денін алма, кептірілген жеміс-жидектер, ыдыс жуатын сұйықтықтар, ыдыстар, полиэтилен, сусындар, пластмасса бұйымдары, күкірт қышқылы құрайды. Ал керісінше Қазақстаннан сол жаққа экспортталатын жүктердің қатарында арпа, жасымық, қант, пиломатериал, бидай ұны, күнбағыс майы, хлорлы калий, газет қағазы, мотор майы сынды жүктер көп.