Ақтауда Қытай компанияларының қатысуымен ірі логистикалық хаб құрылады

11 шілде күні Маңғыстау облысының әкімі Нұрдәулет Қилыбай Қытай Халық Республикасының «Чжунъюнь Гоцзи» және «Гою Учань» компаниялар тобының төрағасы Юй Боянмен ресми кездесу өткізді. Кездесуде тараптар өңірдің көлік-логистикалық әлеуетін арттыру және халықаралық сауда байланыстарын кеңейту бағытындағы ынтымақтастық мәселелерін талқылады, деп хабарлайды Rail-news.kz.

Келіссөз барысында қытайлық тарап Ақтау қаласында заманауи теңіз порты мен көпфункционалды логистикалық орталық салу туралы инвестициялық ұсынысын ортаға салды. Жоба Қытай тарапынан толық қаржыландырылып, Транскаспий халықаралық көлік дәлізін (ТХКД) тиімді пайдалануға бағытталмақ. Бұл бастама Маңғыстауды Еуразия құрлығындағы басты транзиттік хабтардың біріне айналдыруды көздейді.

Маңғыстау облысының әкімі Нұрдәулет Қилыбай стратегиялық маңызы бар жобаға облыс әкімдігі тарапынан толық қолдау көрсетілетінін жеткізді.

– Бұл бастама Маңғыстау облысының көлік-логистикалық әлеуетін арттырып қана қоймай, аймақтың экономикалық дамуына серпін береді. Жобаны тиімді әрі жедел іске асыру үшін барлық жағдайды жасауға дайынбыз, – деді аймақ басшысы.

Кездесу соңында Маңғыстау облысы әкімдігі мен «Чжунъюнь Халықаралық Өнеркәсіптік Компаниясы (Хэйлунцзян)» арасында өзара ынтымақтастық туралы меморандумға қол қойылды.

Айта кетейік, бұған дейін – биылғы сәуір айында Юй Боян бастаған делегация Маңғыстауға арнайы сапармен келіп, логистикалық хаб жобасына қызығушылық білдірген болатын. Бұл кездесу – екіжақты ниетті нақты әрекетке айналдырған маңызды қадам ретінде бағаланып отыр.

Жобаның жүзеге асуы Маңғыстау өңірінің инвестициялық тартымдылығын арттырып, жаңа жұмыс орындарын құрып, халықаралық сауда ағымдарының жаңа бағытын қалыптастыруы мүмкін.