Атырауда вагон доңғалақтарын жинақтау цехы ашылды

Атырау вагон құрастыру зауытында теміржолшылар мерекесі қарсаңында жаңа цех – вагон доңғалақтарын жинақтау шеберханасы іске қосылды.  

Кәсіпорын сусымалы, ірі габаритті, сұйық, жартылай сұйық және өнеркәсіптік, тағысын тағы әртүрлі жүктерді тасымалдауға арналған жүк вагондары мен мұнай өнімдеріне арналған цистерналар және үш осьті тіркеме платформалар шығаруға маманданған.

«Вагон-доңғалақ-жинақтау шеберханасы» (ВДШ-Атырау) ЖШС директоры Олег Новиковтың айтуынша, бұл Атырау облысында доңғалақ жұптарын қалыптастыру мен жүк вагондарының доңғалақ жұптарын күрделі жөндеуден өткізудің толық циклын автоматтандырылған түрде жүзеге асыратын алғашқы доңғалақ-жинақтау шеберханасы. Ең заманауи стандарттар бойынша жабдықталған шеберхананың жоспарланған өндірістік қуаттылығы – жылына 10 000 доңғалақ жұбын шығару. 2025 жылғы мамыр айында «ҚТЖ» ҰК» АҚ-ның құзыретті комиссиясы ревизиялық құрылым және вагон шаруашылығы саласының мамандарымен бірге өндірісті кешенді тексерістен өткізген. Нәтижесінде, ВДШ-ның нормативтік-техникалық талаптарға толық сәйкестігі расталып, РУ1-РУ1Ш, РВ2Ш типті доңғалақ жұптарына ағымдағы, орташа және күрделі жөндеу жүргізу, сондай-ақ жаңа доңғалақ жұптарын жасау үшін «3038» шартты нөмірі берілді.  

Шеберханада құрастыру цехы, доңғалақ-ролик, токарьлық, престеу, т.б. цехтар бар, толықтай автоматтандырылған. Мамыр айынан бастап техникалық сипатта жұмыс жасап жатқан цехта 500-дей доңғалақ жұптары жөнделген. Шеберханадан шыққан доңғалақтарға 5 жыл кепілдік беріледі. Бүгінгі таңда бұл кәсіпорында теміржол саласында үлкен тәжірибесі бар 80-ге жуық маман жұмыс істеп жатыр.  

Айта кетейік, Атырау вагон құрастыру зауыты (АВҚЗ) және «Махамбет» өнеркәсіптік-өндірістік кешені – ауыр машина жасау саласындағы ауқымды индустриялық жобаның бір бөлігі.