Сенат депутатымен кездесу өтті

Атырауда ҚР Сенатының депутаты, экономикалық саясат, инвестициялық даму және кәсіпкерлік комитетінің мүшесі Сағындық Лұқпанов өңір теміржолшыларымен кездесті.

Осы өңірден сайланып, өлке теміржолы саласында еңбек еткен депутат өзінің ұшқан ұясымен қауышқанына өте қуанышты екенін жеткізді. Атырау жүк тасымалы бөлімшесінің директоры Аслан Базарғалиев қонақтың өмірбаянымен қысқаша таныстырып өтті. Сағындық Есенғалиұлы Атырауда туған, осында теміржол техникумын бітіріп, еңбек жолын бастаған. Қарапайым жұмысшыдан Атырау магистральдық желі бөлімшесі басшысына дейін көтерілген. Аймақ теміржолының дамуына өзіндік үлесін қосып, қолтаңбасын қалдырған ол облыс әкімінің орынбасары лауазымын да атқарған. Бүгінде Сенат депутаты.  

– Тұрғындармен кездесу – халықты қандай мәселелер толғандыратынын жақсы білуге мүмкіндік береді және жедел әрекет етуді талап етеді. Заң шығарушы орган өкілдері халықпен тығыз байланыста болса, ел үшін тиімді шешімдер қабылданады. Түсіндіре кетейін, ҚР Парламенті екі палатадан тұрады. Төменгі палата – ол Мәжіліс, оның құзыреті – заң дайындап, қабылдау. Жоғарғы палата – Сенат, қабылданған заңды мақұлдау не түзетуге жіберу. Сенатта әр облыс- тан екі депутаттан – 40 депутат, 5 депутат ҚР Халық ассамблеясынан, барлығы 45 депутат. Биылғы жылы Сенат 80 заңды қарады, оның ішінде 14-і түзетулермен кері қайтарылды. Енді темір жолға келетін болсақ, ол нарықта негізінен тасымал арқылы табыс табатынын білесіздер. Оның ішінде транзиттік тасымал, жүк және жолаушы тасымалы да бар. Соңғы жылдарда теміржол тарифтері қайта қаралып, балансты ашық көру үшін бұрынғы дифференцияланған тарифтің орнына өзін-өзі ақтайтын көрсеткіш талабы қойылды. Соның ішінде субсидияланған жолаушылар тасымалы алынып тасталған, енді соны қайта қарау қарастырылуда. Жалпы теміржол саласында жетістіктер аз емес, бірақ шешімін күткен мәселелер де жеткілікті. Олардың бәрі алдағы уақытта оң бағытқа өзгереді деп сенеміз, – деді депутат.

Елдегі экономика туралы айта келіп, ол үш облыс – Астана, Алматы және Атырау облыстарының бюджеті өз-өзін ақтап отырғандығын атап өтті, яғни жергілікті салық мөлшері облысты қамтып отыр. Ол сондай-ақ өңірде мұнай мен газ өндірісінің дамуы экономиканың өсіміне ықпал етіп отырғандығын жеткізді. Яғни қазір тек өндіруші ғана емес, мұнай мен газды өңдеуші елге айналып келеміз. Мұнайдан қазір полипропилен, каучук, күкірт, т.б. өнімдер жасалып жатыр. Олар – болашақ үшін маңызды жобалар.  

айтуынша, темір жолдың қазіргі дамуы елдің экономикалық талаптарына сай, соған жауап берерліктей болуы керек.  

«Бізде қазір теміржол әлеуеті дамып келеді, Қытаймен, Еуропамен байланыс жақсарды, сондықтан темір жол арқылы табыс табу мүмкіндігі артты. Көліктік-логистикалық хабтар құрылып жатыр, ол да экономикаға үлкен серпін береді. Екінші мәселе, адами капиталды дамытуымыз керек, теміржолшы деген мәртебелі атаққа әр жұмысшы лайық болуы тиіс. Яғни Президентіміз Қасым-Жомарт Тоқаев ұсынған «Адал азамат» тұжырымдамасын берік ұстануымыз керек. Біз қазір білім және ғылым заманында, инновациялық технологиялар мен тың жаңалықтар дәуірінде өмір сүріп жатырмыз. Осы кезеңде елімізде өзін-өзі дамытуға, жаңа дағдыларды меңгеруге, қабілетті шыңдауға, білім көкжиегін кеңейтуге барлық жағдай жасалған. Мұндай мүмкіндікті құр жібермеу керек», – деді ол.  

Кездесу соңында халық қалаулысы аймақ теміржолының даму үдерісімен танысып, теміржолшылардың сұрақтарына жауап берді.