Мамандық таңдау – маңызды қадам
Ақтөбе облысы бойынша меншікті тілші
Шалғай ауылдағы теміржолшы жастар мамандығын мақтан етеді. Оларға туып-өскен жерде таңдаулы кәсібін игеру тұрақтылық кепілдігі мен даму мүмкіндігін береді. Салада абыройлы еңбек етіп, түрлі жобаларға қатысып жүрген жастардың бірін әңгімеге тарттық.
Мейіржан Лекеров – Шалқар белгі беру және байланыс дистанциясының электромеханигі. 34 жастағы жас маман ірі апаттық жағдайдың алдын алып, көзге түсіп үлгерді. Ол дәл жаңа жылда, өткен 31 желтоқсаннан 1 қаңтарға қараған түні вагонның аса күрделі ақауын анықтап, бәрін таң қалдырды. Өйткені вагон қараушы емес, электромеханиктің мұндай ақауды көре қалуы шынымен таңданарлық жағдай еді.
«Жұмыс 8 сағат болғанымен, қауіпсіздікке жауапты болған соң 24 сағат байланыста боламыз. Сол түні станциядан өтіп бара жатқан жүк пойызынан ақау тауып, вагон астындағы сынық дер кезінде жойылды. Бұл менің жауапкершілігім және қауіпсіздікті сақтау – міндетім», – деді ол.
Мейіржан ШЧ-3 мекемесіне қарасты Бегімбет разъезінің электромеханигі. Өзі осы ауылда туып өскен. Шалқар – Тассай учаскесінде жұмыс істейді. Көлік және коммуникациялар колледжін автоматика және телемеханика мамандығы бойынша бітірген ол жұмыс істеп жүріп жоғары оқу орнын тәмамдап, диплом алды. Қауылжыр, Ұлпан станцияларында электромеханик болды. 2016 жылы пайдалануға берілген Шалқар – Бейнеу жаңа желіге аға электромеханик болып ауысып, жұмысқа барған жас мамандардың бірі. Жаңа желі жастарға шексіз мүмкіндік берді. Ауыл жастары жұмыспен қамтылды, ауылда тұрақтады. Айтуынша, мамандық таңдау – адам өміріңдегі ең маңызды қадам, ал теміржолшы болу – мәртебе.
Мейіржан биыл еңбек өтіліне байланысты «10 жыл» белгішесін алды. Бүгінде әріптестермен бірге жаңа жоба дайындау үстіде. Құрылғылардағы схемаға өзгеріс енгізу туралы ұсыныс жобасы жасалып, қазір оны дамыту үстінде.
Күнделікті жұмысы орталықтандырылған байланыс аппараттарын бақылаумен байланысты. Олардың тұрақты, тоқтаусыз жұмыс істеуін қадағалайды. Соның ішінде бағдаршамдар, бағыттама бұрмалардың ақаусыз жұмыс істеуіне жауапты.
«Шалқар – Тассай учаскесі заманауи қондырғылармен бірінші болып жабдықталды. Барлық жүйе, жұмыс компьютерлендірілген. Қызметкерлердің дені жастар. Заманауи техника мүмкіндіктерін пайдаланып отырмыз. Жұмыс істеуге барлық мүмкіндік жасалған. Кей учаскелерде табломен отырса, бізде толықтай жұмыс компьютерлендірілген. Құрылғылардың барлығы жаңа, шағын мөлшерде. Ыңғайлы», – деп мақтанды ол.
Шалқар – Тассай аумағында қазір үш аға электромеханик, 9 электромеханик және 18 электромонтер жұмыс істеп жүр. Олардың бәрі орталықтандырылған байланыс желісінің тоқтаусыз жұмыс істеуіне жауапты.