Марапат мерей өсірер...

Атырауда ел экономикасының локомотиві саналатын теміржолшылар күні салтанатты түрде аталып өтті. Оған өлке теміржолында қызмет етіп жатқан жұмысшылар мен сала ардагерлері қатысты.

Жиынды Атырау жүк тасымалы бөлімшесінің бастығы Аслан Базарғалиев пен магистральдық желі бөлімшесінің директоры Аралбай Қосымбаев құттықтау сөзбен ашып, жетістіктерге тоқталып өтті. Жарты жылдың қорытындысы бойынша аймақта 16 пайдалану көрсеткішінің 15-і жүз пайыздан асыра орындалған. Биыл өңірде 66,7 шақырым жолды күрделі жөндеу керек болса, қазіргі уақытта соның 42,1 шақырымы жасалған. Қозғалыс қауіпсіздігін сақтау бойынша да көрсеткіш жаман емес, тек 1 оқиға болған. Жұмысшылар қысқы-жазғы киіммен 100 пайыз қамтылып отыр. Басшылардың айтуынша, соңғы жылдары жұмысшылардың жалақысы 80 пайызға өскен. 10, 20, 30 жыл еңбек еткендерге сыйақы да тұрақты беріліп отыр. Өз кезегінде құттықтау сөз алған аймақтық ардагерлер кеңесінің төрағасы Қабиболла Айтимов та бүгінде теміржолшылардың жағдайы жақсара түскеніне аға буынның тек қуанатынын жеткізді.  

Әрине төл мереке марапаттау рәсімінсіз өте ме?! Алдымен Атырау облысы әкімі С.Шәпкеновтің Алғыс хатымен Қарабатан станциясы тасымал құжаттарын өңдеу операторы Айсұлу Жұмағалиева, Теңдік станциясының жүк кассирі Нұргүл Ораққызы бастаған бір топ еңбеккерлер марапатталды. Ал Атырау жол дистанциясының жол жөндеушісі Мұғамилин Жалғас Сабырғалиұлының ата-анасына «ҚТЖ» ҰК» АҚ Басқарма төрағасы Талғат Алдыбергеновтің Алғыс хаты табыс етілді. Жалғас – жай теміржолшы ғана емес, теміржолшылар арасындағы марафондарда үнемі жүлделі орындар алып жүрген мықты спортшы, сонымен қатар өзі тұратын Нарын станциясында қарттарға, мүмкіндігі шектеулі жандарға және зейнеткер-теміржолшыларға ерікті түрде әрқашан қолғабысын тигізіп, қолдау білдіріп жүрген жас. Сондықтан да Компания басшысы осындай кең жүректі, қайырымды ұл өсіргені үшін оның ата-анасына Алғыс хат жолдапты. Аймақ теміржолының басшылары оны әкесі Сабырғали ағаға табыстады.  

Әлбетте, теміржол саласындағы ең жоғары награда ол – «Құрметті теміржолшы» төсбелгісі. Осындай құрметті атаққа өңірде биыл төрт адам ие болды. Олар: Құлсары жол дистанциясының жол шебері Жаңбырбай Сатов, Мақат станциясының кезекшісі Зейнолла Аққалжанов, Құлсары жол дистанциясының инженер-метрологы Клара Суриева, Ақжайық белгі беру және байланыс дистанциясы бастығының байланыс жөніндегі орынбасары Жақсыбай Айтжанов. Сонымен қатар Астананың төрінде, Көлік министрлігінде марапат алған өлке теміржолшылары қатарында 3-ші дәрежелі «Еңбек Даңқы» орденімен Атырау электрмен жабдықтау дистанциясының Аққыстау аудандық электр торабының бастығы Даурат Мырзашев пен Махамбет станциясының аға тасымал құжаттарын өңдеу операторы Айжан Қадырова бар. Сондай-ақ Атырау жол дистанциясының жол монтері Хруш Лутов «Үздік жол жөндеуші», Атырау вагон пайдалану депосының Мақат станциясында вагондарды тексеруші-жөндеушісі Оңдасын Исалиев «Үздік вагоншы», Мақат локомотив пайдалану депосының тепловоз машинисі Алмат Ахмедов «Үздік машинист», осы депоның локомотив қабылдаушысы Жалғас Байдалиев «Адал еңбегі үшін», Атырау локомотив пайдалану депосының машинист-нұсқаушысы Еркінбек Адиев «Кәсібі бойынша үздік» төсбелгілерімен марапатталса, Ақжайық белгі беру және байланыс дистанциясының аға электр механигі Мұратбек Исабаев «ҚТЖ» ҰК» АҚ «Үздік мамандар» Құрмет тақтасына ілінді. Тағы жетпістен аса теміржолшы «ҚТЖ» ҰК» АҚ басқарма төрағасының, «ҚТЖ-Жүк тасымалы» ЖШС директорының, Атырау жүк тасымалы және Магистральдық желі бөлімшелері басшыларының Құрмет грамотасы және Алғыс хатымен марапатталды. Жиын сала өнерпаздарының орындауында концертке ұласты.