Студенттер теміржол әліппесімен танысты
Абай облысы бойынша меншікті тілші
Семей ЖТ бөлімшесінде Жұмысшы мамандықтары жылы аясында жергілікті теміржол колледжі студенттерімен кездесулер жиі өткізілуде.
Жуырда оқу орнының «Темір жолдағы жылжымалы құрам бойынша эксплуатация, жөндеу және техникалық қызмет көрсету» мамандығы студенттері Семей локомотив пайдалану депосына танымдық дәріске келді. ПСЖД-322к шәкірттері депоның бір күндік қызметімен танысу өткізді.
Студенттер бұл күні қозғалыс саласындағы теміржолшылар қызметімен жан-жақты танысты. Әсіресе локомотивтерді кезекті рейске шығарар алдындағы жасақтау, техникалық қызмет көрсету жұмыстарын қызығушылықпен тамашалады. Сол тәрізді тепловоз машинисінің арнайы нұсқаулық аясындағы қызметіне де қанықты.
– Бөлімше бойынша біздің мекемеміз студенттермен жиі кездесулер өткізуде. Жастардың теміржол мамандықтарына қызығушылығы жоғары екені қуантады. Сұрақтары да салмақты. Білуге, темір жолдағы қызмет барысын сезінуге құштарлықтары да аса жоғары, – дейді өндірістік нұсқаушы, ТЧЭ-24 кәсіподақ ұйымының төрағасы Серік Дүйсенбаев.
Сонымен қатар бұл күнгі оқу-танысу іс-тәжірибесі барысында студенттер қауымына теміржол бойындағы қауіпсіздік мәселелері де кеңінен түсіндірілді. Олар еңбек қорғау кабинетінде өткен арнайы дәріске қатысты.