Ардагерлер аллеясы ашылды
Атырау облысы бойынша меншікті тілші
Теміржолшылар мерекесіне орай Атырау вагон пайдалану депосы аумағынан «Ардагерлер» аллеясы ашылды. Бес жүзге жуық шаршы метрді құрайтын аллеяда түрлі ағаштар егілген, отырып демалатын сәкілер қойылған.
Аллеяның ашылу салтанатына деподан зейнетке шыққан ардагерлер, қазіргі орта және жас буын өкілдері қатысты. Алдымен сөз алған депо бастығы Әмірбек Бейсеев ұжым болып осындай ұйғарымға келгендерін мәлімдеді.
Шынында, ардагерлердің жиі-жиі кездесіп, өзара әңгіме-дүкен құруына, бас қосып теміржол саласындағы мәселелерді талқылауына да, қыдырып-демалуына да бұл аллея таптырмас мүмкіндік. «Аллеяның сіздерге жақсы демалыс орны болатынына сенеміз. Тек жұмыс күндері ғана емес, демалыс күндері де келуге болады» деді депо бастығы.
Депо ардагері, бұрынғы басшысы Юнус Құлжанов пен Атырау жүк тасымалы бөлімшесінің бастығы Аслан Базарғалиев лента қию рәсімін жасап, аллеяға жол ашты. Арнайы тігілген қазақы киіз үй ішінде қонақтарға ас беріліп, сый-құрмет көрсетілді, ән шырқалып, күй тартылды. Риза болған ардагерлер аллеяны аралап, естелік суретке түсті.
