«Абай quiz» зияткерлік ойынында теміржолшылар жүлде алды

Абай облысында Абайдың 180 жылдығына арналған онкүндік мерейтойлық іс-шаралар легі жалғасуда. Республикамыздың ғана емес, әлемнің әр елінен келген қонақтар жиналған осынау айтулы шараға жергілікті теміржолшылар қауымы да атсалысуда.

Семей ЖТ бөлімшесінің қыз-жігіттері алты алашқа сауын айтқан осынау үлкен шараға алдын ала зор дайындықпен келген болатын. Теміржолшылар қатысқан алғашқы бәсеке ұтқыр да тапқыр жастардан құралған куиз командасы болды. Шараның мақсаты – жастардың ұлт руханиятына деген қызығушылығын арттыру, Абай мұрасын заманауи форматта насихаттау және қазақ тіліндегі зияткерлік ойындарды кеңінен дамыту болатын.  

«Абай QUIZ» республикалық зияткерлік ойынына еліміздің 10 өңірінен келген 180 команда, 1080 зияткер азамат қатысты. Зияткерлік сайыс жеті кезеңнен тұрды. Әр кезеңде Абай мұрасы мен әртүрлі салаларға байланысты тақырыптар қамтылды. Ойын барысында қатысушылар ой ұшқырлығы мен білім деңгейін сарапқа салды. Сайыстың жалпы жүлде қоры 4,7 миллион теңгені құрады.  

Бәсі жоғары осынау сайысқа қатысып бақ сынаған семейлік теміржолшылар командасы өз мамандықтарына сай тақырыпқа тез жауап тауып, жылдам да шалт қимылдарымен көзге түсті. Семей теміржол вокзалының қызметкері, команда капитаны Меруерт Әуелғазина бастаған топ 180 команда арасында барынша үздік өнер көрсетті. Нәтижесінде «Ең креативті команда» аталымын жеңіп алып, ақшалай жүлдені қанжығаға байлады. Бас жүлде бір миллион теңге Астанадан келген азулы команданың еншісінде кетті.  

Айта кетер ерекшелігі сол, бұл көрсеткіш республикалық деңгейдегі ұлттық рекорд ретінде Қазақстан рекордтар кітабына ұсынылды.  

– Жастарымыз жақсы өнер көрсетті. Техникалық саланың мамандары едік деп өздеріне шектеу қойып тұрған жоқ. Әдеби, рухани тұрғыдағы логикалық сауалдарға тез әрі дәл жауап беруге тырысты. Айтпақшы, команда мүшелерінің қатарында әр кез республикалық, облыстық деңгейдегі қазақша куиз ойындарына қатысып, жүлделі оралып жүрген теміржолшылар бар, – дейді НЖС-6 кадр бөлімінің басшысы, Абай тойына қатысты іс-шараларды ұйымдастырушы Данияр Баймағұлов.  

Теміржолшылар қатысып жатқан іс-шаралар көрігі енді қызуда. Мәселен, НЖС-6 техникалық бөлімінің бастығы, ұлттық компания желаяғы Нұрлан Бегадилов бастаған әуесқой жеңіл атлеттер «Аbai joly ultra trail» жарысына қызу даярлық үстінде. Бұл сайысқа қатысушылар ақынның 180 жылдығына орай Семей мен Жидебай арасындағы 180 шақырымды небары 24 сағат ішінде жүгіріп өтуі тиіс.  

Рух, тарих және табиғат тоғысатын осынау ерекше сайыста теміржолшылар қауымына жеңіс тілейміз.