Көкшетауда Құрметті теміржолшы Мұратбек Тілеуленовпен кездесу өтті
Биылғы «Жұмысшы мамандықтары жылы» аясында Көкшетаудағы «Достар» мәдениет сарайында өңірге белгілі Құрметті теміржолшы Мұратбек Тілеуленовпен кездесу өтті. Бурабай вагон пайдалану депосында еңбек етіп, теміржолшы мамандығы ұрпағына жалғасып келе жатқан ардагер әулетінің өнегелі жолы өзгелерге үлгі етілді.
Мұратбек Мұқашұлы мектепті бітіргеннен кейін еңбек жолын 1974 жылы Қазақ темір жолы Державинка жол дистанциясында жол жөндеуші болып бастаған. 1977 жылы Есіл станциясының локомотив депосында тепловоз машинисінің көмекшісі болып жұмыс істеген. Содан кейін жылжымалы құрамды жөндеу жөніндегі слесарь, вагондарды қараушы-жөндеуші, Арқалық станциясы техникалық қызмет көрсету пунктінің бастығы болып еңбек еткен. Астана вагон пайдалану депосында директордың жөндеу жөніндегі орынбасары, бас инженер, депо бастығы болып та өз үлесін қосқан.
Ақмола магистральдық желі бөлімшесінде вагон паркін сақтау жөніндегі бөлімнің бас маманы, техникалық пайдалану басқармасының шұғыл–басқарушы бөлімінің бастығы, Вагон шаруашылығы департаменті директорының вагон паркімен жұмыс жөніндегі орынбасары болып, ал 2011 жылдан бастап Бурабай курорты пайдалану вагон депосы директоры болып жұмыс істеді. Темір жол саласындағы адал еңбегі үшін: «ІІІ дәрежелі еңбек даңқы» орденімен, «Қазақстан темір жолына 100 жыл», «Біртұтас қазақ темір жолына 50 жыл» мерейтойлық медалімен, «Құрметті теміржолшы» белгісімен 2014 жылы марапатталған.
Мұратбек Мұқашұлы өзінің теміржолшылар әулетіне, өмірі мен еңбек жолына тоқталып, оқырмандардың сұрақтарына жауап берді. Қазіргі уақытта балаларына, немерелеріне тәлім-тәрбие, кеңес бағдарын беріп отырған ардагер теміржолшымен кездесу өскелең ұрпақ үшін танымдық бағытта қызықты өтті. Кездесу барысында көпшілік оқырмандарға еңбек тақырыбына арналған «Еңбек – өмір мәні» атты кітап көрмесі де ұйымдастырылды.
Қарлығайын Накешева,
кітапхана меңгерушісі Көкшетау