Абай әлеміне саяхат
"Қазақстан теміржолшысы" газетінің Жамбыл облысындағы меншікті тілшісі
Жамбыл магистральдық желі бөлімшесі қызметкерлері арасында «Абай әлеміне саяхат» атты арнайы семинар-конкурс өтті. Абай Құнанбайұлының туғанына 180 жыл толуына орай ұйымдастырылған шара ұлы ақынның шығармашылығына арналды.
Семинарда Жамбыл жол бөлімшесі ардагерлер кеңесінің төрағасы Бауыржан Найманбаев Абай тағылымы туралы сөз қозғап, хакім шығармаларындағы адал еңбектің насихаты жайлы ой-толғамдарына тоқталды. Филология ғылымдарының кандидаты, Дулати университетінің аға оқытушысы Темірбай Мұқашев ақын шығармашылығындағы әлі де терең зерттелмеген тақырыптарды тарқатып айтып берді.
Теміржолшылар әсіресе, Тараз қалалық Абай атындағы орталықтандырылған көпшілік кітапханалар жүйесінің бөлім меңгерушісі Гүлнұр Нұрпейісованың библиографиялық таныстырылымын қызыға тыңдады. Кітапханашы «Оқитын қалам» топтамасы, «Электронды киіз үй» жобасы бойынша ақынның қандай шығармаларын тыңдауға болатынын көрсетіп, кітапхана қорында Абай және хакімнің өмірі мен еңбегін арқау еткен еңбектер сақталғанын айтып өтті.
Оқу-семинарының соңында тыңдармандар арасында конкурс өткізіліп, қатысушылар Абайдың қара сөздері мен өлеңдерінен үзінді оқып, ақынның өмірі мен шығармашылық жолынан дайындалған сұрақтарға жауап берді.
– Оқу семинарына мұндай форматты таңдауымыздың өзіндік мәні бар. Бұл тәсіл тыңдаушыларды іс-шараның алғашқы кезеңінде баяндамаларды зейін қойып тыңдауға ынталандырады. Себебі, екі кезеңнен тұратын байқаудың талаптары курс қатысушыларына алдын ала таратылады. Сонымен қатар, конкурсқа белсенді қатысқан тыңдаушыларымыздың арасынан жеңімпаздар мен жүлдегерлерді анықтап, дипломдармен марапаттап, сыйлықтар тапсырамыз. Бүгінгі іс-шарада филиалдың персоналдарды басқару бөлімінің бастығы Индира Қоңқашова бастаған спикерлер төрелік етті, – дейді ұйымдастырушылардың бірі, персоналдарды басқару бөлімінің жетекші аудармашысы Ақерке Өтепбергенова.