Ардагер теміржолшыларға құрмет көрсетілді
"Қазақстан теміржолшысы" газетінің Жамбыл облысындағы меншікті тілшісі
Жамбыл жол бөлімшесінің кәсіподақ ұйымы 1 қазан – Халықаралық қарттар күніне орай ардагер теміржолшыларға сый-құрмет көрсетті.
Мерекелік іс-шарада «Жамбыл ЖТ бөлімшесі» филиалының директоры Айдын Сеитбенбетов, «Жамбыл магистральдық желі бөлімшесі» филиалының директоры Мейрамбек Кенжебаев, Теміржолшылар кәсіподағы Жамбыл филиалының төрағасы Ерболат Жидебаев алдыңғы толқынға ізгі тілектерін жеткізіп, саланы дамытуға қосқан өлшеусіз еңбектері үшін алғыстарын жеткізді.
Үш буын өкілдерінің бейресми кездесуіндегі айтылған әңгіме теміржол саласының бүгіні мен ертеңіне қатысты болды.
Зейнетке шыққанша Жамбыл жол бөлімшесіне қарасты құрылымдарда еңбек еткен ардагерлердің құрметіне ақ дастархан жайылды. 96 жасқа келген Жамбыл вагон пайдалану депосының ардагері Әбдімомын Өтегенов өздеріне көңіл бөліп, құрмет көрсетіп жатқан сала басшыларына ақ батасын берді.
Сала ардагерлері кеңесінің төрағасы Бауыржан Найманбаевтың айтуынша, қазір зейнеттегі теміржолшылардың арасында жасы ең үлкені осы Әбдімомын ақсақал екен. Депода ұзақ жыл вагон қараушы болып адал еңбек еткен қария кезінде ең жоғары Ленин орденімен марапатталыпты.
– Ұрпақтар сабақтастығын сақтап, аға буынның кеңесін тыңдау үшін мерекелік іс-шараға арнайы осындай форматты таңдадық. Ардагер теміржолшылар бір дастархан басында бас қосып, әңгімелесіп, бір жасап қалды. Жамбыл жол бөлімшесінің барлық құрылымдарындағы кәсіподақ ұйымдары осындай кездесулер ұйымдастырды. Алдыңғы толқын қарияларға құрмет көрсетті, - дейді Ерболат Жидебаев.
«Жамбыл ЖТ бөлімшесі» филиалының кадрлар бөлімінің бастығы Меруерт Баймұрзаева басшылық тарап филиалда еңбек етіп зейнетке шыққан екі мыңға жуық теміржолшыны ұмытпай, айтулы мерекелерде құттықтап тұратынын айтады. Тіпті ардагерлердің арнайы әлеуметтік картасы да жасалыпты. Соған қарай тізім жасалып, қолдауды қажет ететін қарияларға көмек көрсетіліп тұрады екен.
– Біз биыл «Жамбыл ЖТ бөлімшесі» филиалының ардагерлер тізімі бойынша әлеуметтік осал топтағы, жалғызілікті қарияларды анықтап, 200 зейнеткерге азық-түлік себеттерін таратып шықтық. Ал бөлімше құрылымдарындағы кәсіподақ ұйымдары 600 қарияға арнап ақ дастархан жайып, мерекелік іс-шара ұйымдастырды, - дейді филиалдың кәсіподақ ұйымының төрағасы Серік Наурызбаев.
