Теміржолшылар кәсіподағына – 120 жыл: Жамбылда үздіктер марапатталды
"Қазақстан теміржолшысы" газетінің Жамбыл облысындағы меншікті тілшісі
Кәсіподақтар қозғалысының 120 жылдығына орай «Қазкөліккәсіп» ҚБ Жамбыл облыстық филиалы арнайы мерекелік жиын өткізіп, өңірдегі 18 бастауыш ұйымның белсенділерін марапатталды.
Кәсіподақ ұйымында талай жыл қызмет етіп, ұйымдастырушылық қабілетімен, табанды еңбегімен танылғандар Көлік министрінің, «Қазкөліккәсіп» ҚБ төрағасының Құрмет грамотасы, Алғыс хаттарымен марапатталды. «Теміржолшылар кәсіподағына-120 жыл» медалі тапсырылды.
– Теміржолшылар үшін биыл да айтулы жыл. «Жұмысшы мамандықтары жылына» орай қаншама әріптестеріміздің еңбектері еленуде. Саланы дамыту жолында талай жылдан бері табан ақы, маңдай тері сіңіп келе жатқан мамандарымыз жоғары наградаларға ұсынылып, мерейлері өсуде. Адал еңбек иелерінің қорғаны болған – теміржолшылар кәсіподағына 120 жылдығына орай салалық ұйым көптеген жұмысшыларды, кәсіподақ белсенділерін марапаттап отыр. Кәсіподақтар күніне орай Жамбыл облысы әкімдігінде өткен жиында біздің бір әріптесімізге «Облысқа сіңірген еңбегі үшін» төсбелгісі, тағы үш қызметкерге Кәсіподақтар бірлестігі төрағасының Құрмет грамотасы, Алғыс хаты тапсырылды, – деді кәсіподақ филиалы төрағасының орынбасары Еркін Өтешов.
Салтанатты іс-шара соңында кәсіподақ филиалы кеңесінің отырысы өтіп, 18 бастауыш ұйымның алдағы атқарар жұмыстарының жоспары айқындалды.
