Атырауда теміржолшылар кәсіподақтың 120 жылдығын атап өтті
Атырау облысы бойынша меншікті тілші
Атыраулық теміржолшылар Кәсіподақтар күні аясында теміржолшылар кәсіподағы қозғалысының 120 жылдығын атап өтті.
Атырау магистральдық желі және жүк тасымалы бөлімшелерінің басшылары А.Қосымбаев пен А.Базарғалиев кәсіподақ бастауыш ұйымы өкілдерін атаулы күнмен құттықтап, жұмысшы мүддесіне қызмет ете беруге тілектестік білдірді. Іс-шара барысында өңірдегі ең белсенді деген кәсіподақ мүшелері мен кәсіподақтың дамуына үлес қосқан ардагерлерге «Қазкөліккәсіп» ҚБ төрағасының Құрмет грамотасы мен Алғыс хаты, «Теміржолшылар кәсіподағына-120 жыл» мерейтойлық медалі табысталды.
– Ғасырдан астам уақыт бұрын кәсіподақ қозғалысының қайнар бастауында болғандардың алғашқы қарлығашы біздің теміржолшылар болыпты. Оның үстіне биыл «Жұмысшы мамандықтар жылы» деп аталып отыр, соған орай еңбегі еленіп жатқан барша әріптесерімізді құттықтаймыз. Саланы дамыту жолында табан ақы, маңдай термен еңбектеніп жатқан, кәсіподақ мүшесі болып табылатын әр теміржолшы құрметке лайық, – дейді сала ардагері Нұрғали Есенов ақсақал.