Ұлт руханиятының қайнар көзі
Атырау облысы бойынша меншікті тілші
Жуырда Атырау магистральдық желі бөлімшесінің кәсіподақ ұйымы және кадр бөлімінің ұйымдастыруымен бөлімшеге қарасты мекемелер арасында «Абайдың қара сөздері – қазақтың бойтұмары» атты сайыс өткізілді. Оған 6 команда қатысып, өнер-білім жарыстырды.
Бағдарлама шартына сай сайыста ұлы тұлғаны сомдау, Абайдың әндерін орындау, қара сөздерін мәнерлеп оқу және ақынның өмірін, шығармашылық жолын қамтыған викториналық сұрақтарға жауап беру талаптары қойылды. Қазылар алқасы құрамына теміржолшы-ардагерлер шақырылып, сайыстың төрелігін шешу ұсынылды. Өнер сайысы өз мәресіне жеткен сәтте, «жүзден жүйрік, мыңнан тұлпар» дегендей, оза шапқан командалар анықталды.
Бас жүлде ШЧ-9 Ақжайық белгі беру және байланыс дистанциясы командасына, 1-орын – НЖС жеке шаруашылығы тобына, 2-орын ШЧ-8 Атырау белгі беру және байланыс дистанциясына, 3-орын ЭЧ-4 Атырау электрмен қамту дистанциясының командасына берілді.
Сондай-ақ «Көркем сөздің шебері», «Үздік көрініс», «Көрермен көзайымы» сынды барлығы 12 номинация иелері анықталды. Жеңімпаз командаларға да, номинация иелеріне де мекеме және кәсіподақ атынан сый-сияпаттар табыс етілді. Қазылар алқасы мүшелеріне де қазақи дәстүрмен шапан жабылды.
«Қазақта Абай деген дара тұлға. Ұлт руханиятының қайнар көзі. Негізгі қызметі өндіріс болып саналатын теміржолшылар арасында осындай шараны өткізу – тамаша идея, үлкен жетістік. Осындай шаралар жиі болып тұрғаны абзал», – деді кеш соңында қазылар алқасының мүшесі, ардагер-теміржолшы Нұрғали Есенов.