Құрметті теміржолшы Байбол Орақовтың өмір жолы музей экспозициясына енді

Атырау магистральдық желі бөлімшесі ғимаратының жоғары қабатындағы өлке темір жолынан сыр шертетін музейде соғыс ардагері, кеңес үкіметі кезінде Құрметті теміржолшы атанған Байбол Орақовқа арналған бұрыш ашылды.

Байбол Орақұлы 1900 жылы Маңғыстау түбегіндегі Форт-Шевченко қаласында дүниеге келген. Кейін алмағайып заманда көппен бірге Түркіменстанға өткен. Жастайынан мал бағып өскен ол есейе келе темір жолға қара жұмысшы болып орналасады. Түркімен жерінде темір жол салу ісі басталғанда алғашқылар қатарында қолына күрек ұстап, жол салуға кіріседі. 1938 жылы басшылық оны Мәскеуге СССР жол қатынастары министрлігінің жанындағы 6 айлық жеделдетілген қысқа мерзімді курсқа жібереді. Оны үздік бітіріп келеді.  

Ұлы Отан соғысы жылдары жартылай әскери салада ерлікке пара-пар жанқиярықпен еңбек етіп, 1944 жылы 2 қазанда 40 455 куәлік нөмірімен «Құрметті теміржолшы» белгісімен марапатталады. Сұрапыл соғыс жылдарында «Бәрі де Майдан үшін, бәрі де Жеңіс үшін» деген ұранмен, темір жол сынды стратегиялық маңызды нысанды көзінің қарашығындай қорғап келген Ашхабад темір жолының бірқатар теміржолшысы осы атаққа лайық саналған. Олардың қатарында екі түркімен және жалғыз қазақ Байбол Орақов болды. Сол жылы ол «Еңбектегі ерлігі үшін» төсбелгісін де жарқыратып кеудесіне тағады. Ал 1955 жылы «Еңбек Қызыл Ту» орденімен наградталады.  

Музейден ардагерге арналған бұрыштың ашылу салтанатына облыстық ардагерлер кеңесінің төрағасы Мұрат Өтешев, Атырау магистральдық желі бөлімшесінің директоры Аралбай Қосымбаев, Б.Орақовтың ұлы Мерген Байболұлы және өлке теміржолшылары қатысты.  

«Бұрышқа Б.Орақұлының орден-медальдары, одақтық және республикалық жол басқармаларынан алған басқа да марапаттары мен куәліктері, құжаттары, соғыс кезіндегі және отбасылық суреттері, хаттары мен естеліктері қойылған. Бұл келер ұрпаққа өнеге болатын экспонат-бұрыш болары сөзсіз», – дейді музей қызметкері Базарлым Хансұлтанова.