Атырауда Абай мұрасы дәріптелді
Атырау облысы бойынша меншікті тілші
Биыл ақын, ағартушы, қазақ әдеби тілінің негізін қалаушы, философ және аудармашы Абай Құнанбайұлының 180 жылдығына орай елімізде көптеген шаралар өтіп жатыр. Ұлы ақынның рухани мұрасын паш еткен әдеби кеш Атырау магистральдық желі бөлімшесінде де өткен болатын.
Бағдарлама шартына сай сайыста ұлы тұлғаны сомдау, Абайдың әндерін орындау, қара сөздерін мәнерлеп оқу және ақынның өмірін, шығармашылық жолын қамтыған викториналық сұрақтарға жауап беру талаптары қойылды. 6 команда қатысқан кеш өте тамаша өтіп, Абай жырларымен сусындаған теміржолшылар бір серпіліп қалған. Жуырда ҚТЖ – Магистральдық желі дирекциясы филиалының директоры Сакен Рахметовтен Атырау магистральдық желі бөлімшесі ұжымына арнайы Алғыс хат келді.
«Абай Құнанбайұлының 180 жылдық мерейтойына арнап «Абайдың сөзі – қазақтың бойтұмары» атты арнайы әдеби кеш, дөңгелек үстел ұйымдастырғандарыңыз үшін шынайы көңілмен алғысымды білдіремін. Абай әлеміне терең бойлап, оның рухани мұрасын кеңінен насихаттауға бағытталған мұндай бастамалар ел руханиятын байытып, ұлттық құндылықтарды дәріптеуге сүбелі үлес қосары сөзсіз. Іс-шараға атсалысқан барлық ұйымдастырушылар мен қатысушыларға шын жүректен алғыс айтамын. Еңбектеріңіз жана берсін, шығармашылық табыс пен толағай жетістіктер тілеймін» делінген алғыс хатта. Алғыс хатты Атырау магистральдық желі бөлімшесі филиалының директоры Аралбай Қосымбаевқа кәсіподақ ұйымының төрағасы Марат Бисенғалиев салтанатты түрде табыс етіп, ұжымның бірлігі нығая беруін, өндірістік және рухани жетістігі де мол болуын тіледі.