Ерекше статусқа ие станция

Стратегиялық маңызды нысан Құрық портына тікелей қызмет көрсететін «Құрық порты» станциясы 2018 жылы құрылған, ал станцияның кеме алды сұрыптау паркі былтыр ашылды. Вагондарды құрастыру-тарқату сол жаңа паркте жүзеге асырылады.

Аманқос Құсайынов – қырық жылдық тәжірибесі бар теміржолшы. Станция алғаш ашылған кезде оны басқарған. Арада бірнеше жыл өткенде биыл қайта басшылыққа келген. Станция бастығын порт басынан жолықтырдық.  

– Вагондарды кемелерге тиеп, оларды шығару, астық терминалдарына вагондар беру, вагондардың қауіпсіздігін қамтамасыз ету, тағысын тағы барлық станцияға тән жұмыстар мұнда да атқарылады. Өзгелерден айырмашылығымыз – су көліктерімен жұмыс жасаймыз. Станцияның әкімшілік кеңсесі кіреберісте болғанмен, станция кезекшілері, агенттер мен пойыз құрастырушылар және жүк қабылдап жөнелтушілер, вагоншылар осы порт ғимаратында отырады. Паромға 34-38 вагоннан әкелеміз. Жалпы өзімізде 200-ден астам вагон тұр. Оларды паромға және екі астық терминалына береміз. «Kaspi Grain Way» терминалдарына қызмет етеміз, оның сыйымдылығы 52 вагон, екі кезеңде тепловозбен апарып береміз, өздері түсіреді, біз шығарамыз. «Саржа» терминалының біздің жаңа сұрыптау паркінде өздерінің кіреберіс жолы бар, сол жерде оларға вагондарды құрастырып береміз, өздері тепловозбен бері тартып алады. Транзиттік жүктер Қытай, Өзбекстаннан, Қырғызстаннан келеді. Олар Еуропаға жөнелтіледі. Ал кері қарай бос вагондар қайтады, – дейді «Құрық порты» станциясының бастығы Аманқос Құсайынов.  

Бүгінде аталған станцияда 65 адам жұмыс істейді. Оның ішінде 9 станция кезекшісі, 9 агент, 9 тасымал құжаттары операторы, 5 тауар кассирі, 5 жүк қабылдап-жөнелтуші, 28 пойыз құрастырушы бар. Бәрі 12 сағаттық ауысыммен, көпшілігі Ақтаудан қатынап жұмыс істейді. Бір ауысымға 15 шақты адам шығады. Портта станцияның А және Б екі паркі бар. Әрқайсысы 6 жолдан тұрады. Теміржолшылар қызмет ететін 2 айлақ жұмыс істейді.  

Биыл 10 айда Құрық порты арқылы 1 899 мың тонна жүк түсіріп, тиелді. Оның ішінде кеме кешеніне 1 481,1 мың тонна, «Kaspi Grain Way» ЖШС астық терминалына – 190,8 мың тонна және Саржа терминалына 227 мың тонна жүк келді. Осы ауқымды жүктерді сұрыптау паркінде түсіріп, тиеу, терминалдар мен паромдарға жеткізу, бос вагондарды бері қайтару, вагондарды жөндеу, жарамдылығын тексеру жұмыстарын ерекше статусқа ие станцияның қызметкерлері тәулік бойы жүргізе береді. Еліміздің, әсіресе транзит арқылы халықаралық жүк тасымалын қамтамасыз етуде «Құрық порты» станциясының маңызы жылдан жылға арта түсуде.