Болашақ теміржолшылармен кездесті
"Қазақстан теміржолшысы" газетінің Жамбыл облысындағы меншікті тілшісі
«ҚТЖ-Жүк тасымалы» ЖШС-нің Жүктермен коммерциялық жұмыс департаментінің менеджері Елена Сатыбалдина Тараз теміржол көлік және коммуникация колледжінің студенттерімен кездесті.
«Колледждің жұмыс берушілерімен өзара әрекеттесуі; тәжірибе, проблемалар, перспективалар» тақырыбында өткен кездесуде теміржол саласында 35 жыл қызмет етіп келе жатқан іскер маман болашақ еңбекқор жастардың қолында екенін айтты. Жұмысқа алғаш орналасқанда кездесетін қиындықтар туралы әңгімелеп, өзінің еңбек жолындағы тәжірибесімен бөлісті.
Болашақ теміржолшылар үшін тәжірибелі, білікті маманның кеңесі маңызды екені сөзсіз. Студенттер салада қандай мамандықтарға сұраныс жоғары болатынын сұрады. Ақпараттық технологиялардың, автоматтандыру жүйесінің, сонымен қатар жасанды интеллекттің теміржол саласының дамуына қалай әсер ететіні туралы сауалдар қойды. Жастарды оқу бітіргеннен кейін жұмысқа орналасу мәселесі де алаңдатады екен.
Студенттердің сұрақтарына жан-жақты жауап берген Елена Сатыбалдина теміржол саласында ұрпақтар сабақтастығын сақтаудың маңызды екенін атап өтті. Аға буын өкілдерінің өнегелі еңбек жолы жас мамандар үшін үлкен тәжірибе мектебі саналатынын жеткізді. Студенттерді мамандық бойынша білім алумен шектеліп қалмай, қоғамдық жұмыстарға белсенді қатысуға шақырды. Ал колледж басшыларына болашақ теміржолшылардың мамандыққа деген қызығушылығын арттырумен қатар, әлеуметтік серіктестерімен өзара іс-қимыл жоспарын жасауға кеңес берді.