Болашақ теміржол энергетиктері Семей дистанциясының жұмысымен танысты
Абай облысы бойынша меншікті тілші
Жуырда Семей электрмен жабдықтау дистанциясында ашық есік күні өтті. Оған кәсіптік білім беретін теміржол колледжінің ұстаздары, студенттер, яғни болашақ энергетиктер арнайы қатысты.
Ашық есік күні барысында студенттерге Семей теміржолындағы электрмен жабдықтау қызметінің негізгі бағыт-бағдарлары, сонымен қатар осынау саладағы қауіпсіздік шаралар туралы мол көлемдегі ақпарат ұсынылды. Дистанция қызметкерлері студенттерді жылы қарсы алып, кәсіпорындағы негізгі цехтардың жұмысымен таныстырды.
Шараға қатысушы студенттер «Электромеханикалық жабдықтарға техникалық қызмет көрсету, жөндеу және пайдалану» мамандығы бойынша білім алып жатқандықтан болашақ мамандық иелерін қызықтыратын жайттар мол болды. Сұрақтары да көп екен. Бірқатары теміржол колледжін аяқтаған соң осы мекемеге жұмысқа орналасуға ниетті екендіктерін де жасырмады. Алдағы уақытта олар ЭЧ-18 дистанциясында кәсіптік іс-тәжірибеден өтіп, теориялық білімдерін ұштай түсетін болады.
– Биылғы Жұмысшы мамандықтар жылы шеңберінде өзара ынтымақтастық туралы арнайы меморандум негізінде Семей магистральдық желі бөлімшесі мен қаламыздағы теміржол колледжі және Мансап орталығы аясында бірлескен іс-шаралар жиі өткізіліп тұрады. Жыл соңындағы ашық есік күні осыған орай ұйымдастырылуда. Біздің кәсіпорындарда аталмыш колледж түлектері көптеп еңбек етуде. Болашақ әріптестеріміздің қазіргі күннен бастап нағыз кәсіби маман болуына біз де елеулі үлес қосып жатырмыз, – дейді бөлімшенің кадр басшысы Данияр Баймағұлов.