Аға буынның айтары бар

Жұмысшы мамандықтар жылына орай Тараз қалалық «Жастар» ресурстық орталығы «Болашаққа – техникалық біліммен» атты кездесу ұйымдастырды.

Тараз сервис және технология колледжінде өткен іс-шараға Жамбыл жүк тасымалы бөлімшесі Тараз станциясының коммерциялық агенті Інжу Шаханова мен аға тауар кассирі Сәнімкүл Арыстанова арнайы шақырылды.  

Ұйымдастырушылардың студенттермен кездесуге аға буын теміржолшыларды шақыруында үлкен мән бар. Себебі заман өзгеріп, ақпараттық технологиялар күн санап жаңарып отырса да, логистикалық жүйе экономиканың негізгі драйвері болып қала бермек. Ал Еуразияның жүрегі саналатын Қазақстанның транзиттік әлеуеті өте зор. Елімізде тасымалдаудың негізгі түрі – темір жол. Сондықтан қазір де, болашақта да теміржол саласында жұмысшы және техникалық мамандарға деген сұраныс төмендемейді.  

Кездесуде тәжірибелі теміржолшылар студенттерге техникалық білімнің маңызы туралы әңгімеледі. Інжу Шайымбетқызы еңбек нарығында қандай мамандықтарға сұраныс барын қозғады. Техникалық білім алған жас – ертеңгі күні жоғары технологияларды меңгерген, жаңа идея мен жаңашылдықты өмірге енгізе алатын маманға айналатынын жеткізді.  

Еңбек жолын Тараз станциясында жүк қабылдаушы болып бастаған Сәнімкүл Арыстанова талайлы тағдыры қандай қиындықтарға тап қылса да, жұмысын тастап кете алмағанын айтып, естеліктерімен бөлісті. Таңдауына – табандылық, мамандығына адалдық танытқан кассирдің еңбегі жанып, былтыр «Үздік жүк тасымалдаушы» медалімен марапатталды. Мерейі өскен теміржолшы қазір аға тауар кассирі.