Жолшылар сақадай сай дайын
Ақтөбе облысы бойынша меншікті тілші
Ақтөбеде қыс айының екінші аптасы боранмен басталды. Тас жолдарда көлік қозғалысына шектеулер енгізілді. Ал темір жолды қардан тазартуға 52 техника мен 500-ге жуық қызметкер жұмылдырылды.
«ҚТЖ» ҰК» АҚ филиалы – Ақтөбе магистральдық желі бөлімшесі 2025-2026 жылғы қысқа дайын. Жол бөлімінен алынған мәлімет бойынша пойыздар қозғалысының қауіпсіздігі мен үздіксіздігін қамтамасыз ету жоспары бекітілген. Жоспарланған жұмыстарды уақытылы орындау мақсатында филиал директоры Серғали Жайлаубай басқаратын тұрақты комиссия құрылған. Алгоритм бойынша қар тазалау жұмыстары екі кезеңмен жүргізіледі. Бірінші кезекте негізгі бригадалар бекітілсе, қар қалың әрі ұзақ жауған жағдайда көршілес қызметтердің қызметкерлерінен екінші кезектегі бригадалар жасақталады.
Сонымен қатар қар тазалайтын және автотракторлық техникаларды апатты жағдайда қалпына келтіру үшін арнайы жөндеу бригадалары құрылды. Барлық қызметкерлер қысқы арнайы киіммен және жеке қорғаныс құралдарымен толық қамтамасыз етілген.
– Қазіргі таңда 52 қар тазалау және қар күреу техникасы жұмыс істеп тұр. Теміржол төсемінің қармен жабылуын болдырмау үшін биыл 41 шақырым қардан қорғайтын қоршаулар жөнделді. Желтоқсан айының басынан бері теміржол инфрақұрылымын жауын-шашыннан тазарту жұмыстарына шамамен 500 адам жұмылдырылды. Өткен аптада қалың қар мен боран салдарынан туындаған қиындықтарды жою үшін тиісті қызметтер тәулік бойғы жұмыс режиміне көшті. Жылжымалы құрамның ауа-райына байланысты кешігуі не тұрып қалуы жоқ, – деді Ақтөбе магистральдық желі бөлімшесі жол бөлімінің бастығы Бауыржан Хамзин.