Қолайлы жағдай жасалуда
«ҚТЖ» ҰК» АҚ локомотив бригадалары қызметкерлерінің еңбек және демалыс жағдайларын жақсарту жөніндегі шараларды дәйекті түрде іске асыруда. Өйткені пойыздар қозғалысының қауіпсіздігі тікелей олардың жұмысына байланысты.
Күрделі жөндеуден кейін Атырау станциясында локомотив бригадаларының демалыс үйі пайдалануға берілді. 1970 жылы салынған ғимарат толығымен жаңартылды. Нысанның жалпы ауданы 528,4 м2 құрайды. Демалыс үйі 11 бөлмеден тұрады және 23 төсек-орынға арналған. Сондай-ақ жөндеуден кейін Ағадыр станциясында локомотив бригадаларының демалыс үйі ашылды. 1980 жылы салынған нысан 59 төсек-орынға арналған және 27 жатын бөлмені қамтиды. Астана локомотив пайдалану депосында локомотив бригадалары үшін демалыс бөлмесі ашылды. Жүргізілген жұмыстар локомотив бригадаларының демалыс жағдайларын жақсартуға, жайлылық деңгейін арттыруға және теміржол көлігін сенімді және қауіпсіз пайдалануды қамтамасыз ету үшін қолайлы жұмыс ортасын құруға бағытталған.
Осындай теміржолшылардың әлеуметтік-тұрмыстық жағдайын жақсартуға бағытталған жұмыстар «Жұмысшы мамандықтары жылы» аясында Қызылорда магистральдық желі бөлімшесінде орындалды. Бөлімшенің солтүстігіндегі Сексеуіл станциясындағы қос мекемедегі жұмыс орындары, мекеме ауласы ағымдық жөндеу жұмыстарының нәтижесінде жаңа кейіпке енді.
Мәселен, вокзалдарды қайта жаңғырту барысында алынған ескі, бірақ жарамды құрылыс материалдарын тиімді пайдалану арқылы Сексеуіл қалпына келтіру пойызы мен Сексеуіл өрт сөндіру пойызының білікті мамандары өз қолдарымен модульдік ғимараттарға ағымдық жөндеу жүргізді. Нәтижесінде теміржолшылардың санитарлық-тұрмыстық жағдайы едәуір жақсарып, қызметкерлер үшін жылы, жайлы әрі қауіпсіз жұмыс ортасы қалыптасты. Бөлімшенің бас инженері Берік Бекжанов барлық атқарылып жатқан жұмыстардың түпкі мақсаты – теміржолшылардың еңбегін бағалау, олардың қауіпсіз әрі жайлы жағдайда қызмет етуіне мүмкіндік жасап, әл-ауқатын арттыру, олардың еңбек жағдайын жақсарту екенін атап өтті.
Сұлугүл БАКЕСОВА, Астана
Сабырхан СЕЙІЛБЕКҰЛЫ, Сексеуіл