Тараздық студенттер теміржол тарихымен танысты
"Қазақстан теміржолшысы" газетінің Жамбыл облысындағы меншікті тілшісі
Жамбыл магистральдық желі бөлімшесінде «Ашық есік күні» өтті. Оның шеңберінде Тараз теміржол көлік және коммуникация колледжінің студенттері Жамбыл жол бөлімшесіндегі музейді аралап, өңірдің көлік-логистикасының тарихымен танысты.
Ал мәжіліс залында өткен кездесуде сала мамандары студенттерге кәсіптік-техникалық мамандықтардың келешегі туралы әңгімеледі. Мәселен, «Жамбыл магистральдық желі бөлімшесі» филиалы директорының автоматтандырылған басқару жүйесі жөніндегі орынбасары Асылхан Тайлақбаев пойыздар қозғалысын басқарудың және қауіпсіздігінің цифрлық жүйелерін дамытудағы үдерістерін таныстырды.
Филиалдың персоналдарды басқару бөлімінің бастығы Индира Қоңқашова теміржол саласында жұмысшы және техникалық білімі бар кәсіби мамандарға сұраныс төмендемейтінін жеткізді. Тараз станциясының бас инженері Ерсін Шардарбеков станцияларда қандай жұмыс атқарылатынына тоқталды. Жамбыл электрмен жабдықтау дистанциясының оқыту шебері Марат Құлбаев тоқпен жұмыс істегенде сақталуы тиіс еңбек қауіпсіздігі талаптарын түсіндіріп, дистанцияның магистральдық желі бойында қандай қызмет көрсететіні туралы айтып берді.
Студенттерді көбірек қызықтыратыны – теміржол саласына енгізіліп жатқан жаңашылдықтар екен. Жастар осы мәселе туралы білікті мамандарға сұрақтар қойып, еркін әңгіме өрбіді. Салада қолданылатын нақты жобалар мен практикалық шешімдер талқыланған кездесудің болашақ теміржолшылар үшін берері көп болды.