Абай облысында «Жұмысшы мамандықтар жылы» қорытындыланды
Абай облысы бойынша меншікті тілші
Абай облыстық Кәсіпкерлер палатасының ұйымдастыруымен аймақ бойынша Жұмысшы мамандықтар жылын қорытындылауға арналған жиын өтті.
«Еңбек адамы – ел мақтанышы» атты тақырыпта өткен іс-шараның негізгі мақсаты техникалық және кәсіптік білім беру саласындағы негізгі жетістіктер мен жаңа бастамаларды жұртшылық назарына ұсыну, сондай-ақ еңбек адамдарының қоғамдағы мәртебесін арттыру болды.
Басқосу барысында түрлі салада жемісті еңбек етіп жүрген еңбек адамдары салтанатты түрде марапатталды. Теміржолшылар арасынан Абай облысы бойынша үздік еңбек әулеті атағын жеңіп алған Түкібаевтар династиясы сахна төріне шақырылып, Алғыс хатпен марапатталып, арнайы сыйлықтар табысталды.
Көпшілік жалпы еңбек өтілі 616 жылды құрайтын танымал теміржолшылар әулеті жайлы деректі фильмді тамашалады. Бірнеше жыл қатарынан «Еңбек жолы» республикалық байқауына қатысып, «Үздік еңбек әулеті» номинациясы бойынша жеңімпаз атанған Түкібаевтардың бүгінде бесінші буыны ата кісібін жалғастыруға қадам басқан. Жалпы, әулеттің 37 адамы еліміздің теміржол саласында абыроймен еңбек етіп жүр.
Әулет негізін қалаушылар – ағайынды Маукен, Ілияс, Сыдық деген жігіттер темір жолдағы еңбек жолын өткен ғасырдың сонау 30-ыншы жылдары бастап, Түркістан-Сібір теміржолының құрылысына қатысқан екен.
– Арғы атамыз Мәукен Түкібаев пойыз кондукторы, содан кейін станция бойынша кезекші болған. Екінші дүниежүзілік соғыс жылдарында станция бастығы болып жұмыс істеп, әскери оқ-дәрілер мен азық-түліктерді майданға үздіксіз әрі қауіпсіз жеткізу жұмыстарын қамтамасыз етуге үлес қосқан. Оның ағалары Ілияс пен Сыдық Түкібаевтар аймағымыздағы жол дистанциясында жұмыс атқарған, – дейді кеш барысында марапатқа бөленген Семей жол дистанциясы кәсіподақ ұйымының төрағасы Ғалымбек Түкібаев.
Әкелерінің еңбек жолын Маликриян Маукенұлы, Серікқан Ілиясұлы, Ғали Сыдықұлы, Зұлқұмар Сыдықұлы сынды ұлдары абыроймен жалғастырған. Бүгінде Семей темір жолында, НЖС-6 бөлімшесі мен Семей станциясында Түкібаевтар әулетінің немерелері мен шөберелері жұмыс істеп жүр.