Марапатқа лайық машинистер
Абай облысы бойынша меншікті тілші
Семей локомотив пайдалану депосында ұзақ жылдар бойы елеулі еңбек еткен тепловоз машинистерін барша ұжым мүшелері үлкен сый-құрметпен шығарып салды.
Темір тұлпар тізгініндегі Серік Сапаров пен Қайрат Сәдуақасов жай ғана кәсіби машинистер емес, өз қызметтерінің хас шеберлері. Сондықтан оларға тек жолаушылар пойызын жүргізу сеніп тапсырылған.
Бұл жолғы ерекше рәсім локомотившілердің қалыптасқан дәстүріне сай вокзал басында өтті. Қос машинисті соңғы рет жүргізіп келген тепловоздарынан түсіріп алған ұжымдастары олардың аяғын жерге тигізбей, құшақтарын гүлге толтырды.
– Локомотив пультінде, соның ішінде жолаушылар тасымалындағы тепловозда тек таңдаулы машинистер отырады. Тәртіп пен төзімділікке негізделген тәжірибесі бар жандар ғана лайық. Жол үстіндегі жұмыс барысында өткен ұйқысыз түндер мен кестеден кешігуге болмайтын жауапкершілік әрдайым осы машинистердің бойынан табылады. Сол себептен де зор құрметке лайық, – дейді бұл орайда пікір білдірген ТЧЭ-24 кәсіподақ ұйымының төрағасы Серік Дүйсенбаев.
Құрмет иелеріне деген ілтипат Дархан Қажығұлов басқаратын Семей локомотив депосының барша қызметкерлері жиналған жиында жалғасты. Депо басшылығы мен кәсіподақ бірлесіп мерейгерлерге қазақы дәстүрмен шапан жауып, бағалы сыйлықтар табыс етті. Локомотившілер ұжымы естелік суретке түсіп, қос әріптесін қимай шығарып салды.