Оқу орындарымен меморандумға қол қойылды
"Қазақстан теміржолшысы" газетінің Жамбыл облысындағы меншікті тілшісі
Теміржол саласын орта буын арнайы мамандармен қамтамасыз етіп отырған Тараз теміржол көлік және коммуникация колледжі Мұхамеджан Тынышпаев атындағы Алматы ALT университетімен ынтымақтастық туралы меморандумға қол қойды.
Теміржол саласына кәсіби мамандар даярлауда еліміздегі жетекші оқу орнының бай тарихы мен базасы бар, ғасырға жуық тәжірибесі қалыптасқан. Кезінде Түркістан-Сібір темір жолы дирекциясының бастамасымен Ташкент қаласында орналасқан Орта Азия теміржол көлігі инженерлері институтының филиалы ретінде құрылғаны белгілі. Содан бергі уақыт ішінде Қазақстандағы көлік саласына бағытталған инженерлік білім берудің негізіне айналған осынау тарихы бай , көлік саласын жүйелі түрде жаңғырта алатын, инфрақұрылымдық жобаларды дамытатын және елдің орнықты дамуына қатысты кешенді мәселелерді шешуге қабілетті жаңа буын инженерлерін, логистерін және менеджерлерін даярлап отырған жоғары оқу орнымен өзара ынтымақтастық орнату – Тараз теміржол көлік және коммуникация колледжі үшін үлкен мүмкіндік.
– М.Тынышбаев атындағы ALT университеті – көп салалы жоғары оқу орны. Магистратура, докторантураны айтпағанда, бакалавриаттың 8 бағыты бойынша 44 білім беру бағдарламасымен мамандар даярлайды. Ынтымақтастық туралы меморандум аясында енді біздің студенттеріміз аталған оқу орнының лабораториялық базасында ғылыми-зерттеу жұмыстарын жүргізе алады. Сондай-ақ теориялық және тәжірибелік тұрғыда білімдерін жетілдіруге жол ашық, – дейді Тараз теміржол көлік және коммуникация колледжі директорының оқу ісі жөніндегі орынбасары Жеңіс Тайбеков.