Теміржолшылардың жанашырлығы. Семей вокзалындағы ерекше оқиға
Абай облысы бойынша меншікті тілші
«Жол мұраты – жету» дейді халық нақылы. Ал, сапар барысында түрлі жайттар орын алып жатады. Сан түрлі тағдырлар да тоғысады. Жуырда Семей теміржол вокзалында ешкім күтпеген ерекше жайт орын алды.
Облыс орталығынан 270 шақырымдай қашықтықта жатқан Көкпекті аудан орталығынан бір топ мектеп оқушылары мен балабақша тәрбиеленушілері мұғалімдерімен бірге пойызға отыру үшін Семейді бетке алады. Мақсат – Астана қаласында робототехникадан өтетін «Alem Tech Fest - 2026» атты Азия чемпионатына қатысу. Әйтседе, қарлы бораннан жол жабылып, жолаушылар айналма жолмен Өскемен қаласы арқылы жүруге мәжбүр болыпты.
Бұл жол біршама ұзақ әрі қолайсыз ауа райында Семей вокзалына жету оңайға түспейді. Әр минут санаулы. Ондайда жол да жеткізбей қоятыны бар. Амалы таусылған ұстаздар вокзалдың анықтама бөліміне қоңырау шалып, мән-жайды түсіндіріп, пойыздың күте тұруын өтініп сұрайды. Барлығы 28 адамның билеттері қалтада.
Жолаушылардың шамамен 10-15 минуттай кешігу қаупі туындапты. Осы сәтте Семей вокзалы бастығының кезекші көмекшісі Зәмзагүл Кәрімова бөлімше кезекшісіне хабарласып көмек көрсету мүмкіндігін кеңеседі. Машинистер тізгінді тежей тұра алады. Бірақ, жауапкершілік вокзал қызметкерлеріне артылады екен.
Осылайша, пойыздың жүру уақытынан 13 минут асқан шақта вокзал басына сүріне-қабына оқушылар да жетеді. Өздерін күтіп тұрған №37-ші «Семей -Маңғыстау» пойызын көрген балалар жүректері жарылардай қуанса, мұғалімдері көздеріне жас алып үлгереді. Олар мінетін 15-ші вагон алдында Зәмзагүл Кәрімқызы мен вокзал кезекшісі Құндыз Жантеміровалар қол бұлғап күтіп тұр екен.
Осылайша, шалғай ауылдан әупірімдеп жеткен жолаушылар Семей вокзалы қызметкерлерінің жанашырлығымен пойызға үлгеріпті.
Теміржолда орын алған әрбір жайт есеп берусіз қалмайды. Вокзал қызметкерлері тосын оқиға туралы арнайы хаттама толтырып, жауапкершілікті мойындарына алады. Әйтседе, адамгершілік бәрінен жоғары тұратыны анық.
Ұстаздар мен балалардың ата-аналары семейлік теміржолшыларға жүрекжарды алғыстарын жеткізуде. Түсіністік танытып, жолаушыларға қамқорлық жасаған жандарға шексіз разы.
Айтпақшы, осылайша робототехникадан Азия чемпионатына жол тартқан оқушылар кіл мықтылар арасында топ жарып, жүлделі орын алып қайтыпты.
«Бұл жеңісімізді адамгершілік қасиеттері жоғары Семей теміржол вокзалының қызметкерлеріне арнаймыз. Солардың арқасында жарты әлем жиналған білім бәсекесіне қатыса алдық», - дейді жүлдегер балақайлар.