Семейдегі жас мамандардың ұсыныстары тыңдалды
Абай облысы бойынша меншікті тілші
Бүгінгі Семей теміржолында жастардың үлесі мол. Сала қызметкерлерінің 29 пайызын 35 жасқа дейінгі буын құрайды екен. Жуырда салалық кәсіподақ ұйымының ұйымдастыруымен бөлімшедегі еңбекші жастар қауымымен кездесу өтті.
Басқосуға бөлімше басшысы Алмас Сейсемқанов арнайы қатысып, жастардың ой-толғанысын тыңдады. Жас толқынды не ойландырады, қызметте немесе тұрмыстық өмірінде қандай күрмеулі мәселелері бар, ұсыныс-пікірлері бар, еркін әңгіме өрбіген орта болды.
Алғашқы болып сөз алған Алмас Ғылымұлы ұлттық компанияның жастар саясаты жөнінде сөз қозғады. Өскелең буынның кәсіби және тұлғалық дамуы бойынша атқарылып жатқан шараларға тоқталды. Бұл ретте «ҚТЖ» ҰК» АҚ-ның көшбасшылардың жаңа буынын дамытуға бағытталған «Жастар кадрлық резерві» стратегиялық маңызды бағдарламасы да сөз болды. Осы орайда «ҚТЖ-100 жас есім» жобасының семейлік жеңімпаздары үлгі етілді.
Өз кезегінде жарыса сөз алған жастар да өздерін толғандырған мәселелер жайлы кеңінен сөз етті. Олардың проблемалары туралы көп әңгіме өрбіді. Жас мамандардың әлеуетін ашып, болашақ менеджерлерді тәрбиелеуде олардың бастамалары да маңызды екендігі белгілі. Бұл ретте жастар өз ұсыныстарын көпшілік алдында ашық талқылап, сызбанұсқа ретінде креативті түрде көрсетіп берді.
Ал «Қазтеміржолкәсіп» ҚБ Семей аймағы бойынша өкілі Есен Қажығұлов еңбек құқығын қорғау, жалпы кәсіподақ қызметі жайды кең көлемде сөз қозғады.
Сол тәрізді басқосуға бөлімшенің кадр бөлімі басшылығы, спорт нұсқаушысы да қатысқандықтан жастар сауалдарын қойып, жауап ала алды.
Жергілікті ардагерлер қауымы атынан Құрметті теміржолшы, «Түрксіб-Семей» мұражайының құрметті директоры Мақсұт Көшжанов сөз алып, нағыз кәсіби теміржолшы болып қалыптасу туралы аталы ақыл-кеңес беріп, сөзінің соңында жастар қауымына баталы тілек білдірді. 90 жастың төріне шыққалы отырған қадірменді қарияның көрегенді сөздері көпшілік жастарға ой салды.
Жиын қорытындысында алдағы уақытта бөлімшедегі қоғамдық іс-шараларда жастар белсенділігін арттыра түсу, кәсіподақ ұйымымен байланысты мейлінше жандандыру жайлы өзара уағдаластық жасалды.
