Ғибратты ғұмыр иесі
Қызылорда облысы бойынша меншікті тілші
Қызылорда агротехникалық колледжінде Құрметті теміржолшы, ақын және аудармашы, «Иман» сыйлығының және ҚР Журналистер одағы сыйлығының иегері Шайхислам Серікбайұлының 100 жылдығына арналған «Қоғам шындығын қаламмен жазған қаламгер» атты әдеби-танымдық кеш өтті.
Теміржолдың аймақтық ардагерлер кеңесінің төрағасы Марат Шайжан бастаған сала ардагерлері мен теміржолшылар, студенттер қатысқан кеште Сыр елінің аяулы перзентінің өнегелі өмір жолы жайлы «Халқына қалаулы қайраткер» тақырыбында кітап көрмесі таныстырылды.
Теміржол саласында қызмет атқара жүріп қаламды да қатар ұстаған жан – «Жанқожа батыр», «Жалаңтөс бахадүр» пьесалары, «Аңыз бен ақиқат», «Тұлғалар», «Даналар мен даралар» секілді бірнеше тарихи-тағылымдық, әдеби-зерттеу, поэзиялық кітаптардың авторы. 1926 жылы 22 наурызда Қызылорда облысы Қазалы ауданында дүниеге келген ол соғыс жылдары жасөспірім кезден еңбекке араласып, ФЗО – Жұмысшы жастар мектебінде білім алады. Кейін Ташкент техникумын, Мәскеудің көлік инженерлері институтын бітірген.
Жиында сөз алған сала ардагерлері естеліктерімен бөлісті. Еңбек жолын Қазалы локомотив депосында бастап, ұзақ жылдар бойы Қызылорда теміржол бөлімшесінде кадр саласын басқарған, сонымен қатар Қазалы аудандық партия комитетінде, Қызылорда облыстық партиялық және халықтық бақылау комитеттерінде жауапты қызметтер атқарған Шайхислам Серікбайұлының теміржол саласы ғана емес, облыс көлемінде абыройы асқан ерекше білімді, өткір, парасатты жан болғаны сөз болды. Мақалалары кезінде одақтық «Правда», «Гудок» газеттерінде және басқа да басылымдарда жарияланып тұрған. Өмірден өткенше қолынан қаламы түспеген қаламгер-журналист ретінде ақиқаттың ақ туын жықпай ғұмыр кешкені айтылды.
Баспа ісі мен мемлекеттік-қоғамдық саладағы жемісті еңбегі үшін Шайхислам Серікбайұлы Қазақ КСР Жоғарғы Кеңесінің Құрмет грамотасымен, сондай-ақ одақтық және республикалық деңгейдегі грамоталарымен және бағалы сыйлықтармен марапатталған. Кештің мазмұнды түйіні қоғамға пайдалы іс тындырып, ғибратты ғұмыр кешудің жарқын үлгісін паш ету болды.
