Ақтөбе теміржолшылары су тасқынына дайындықты күшейтті
Ақтөбе облысы бойынша меншікті тілші
Ақтөбеде магистральдық желі бөлімшесі көктемгі су тасқынына дайындықты күшейтті. Айдың басында арнайы штаб құрылып, қауіпті нысандарда тәулік бойы бақылау ұйымдастырылған.
Магистральдық желі бөлімшесі жол бөлімінің бастығы Бауыржан Хамзиннің айтуынша, су тасқынына қарсы жедел жоспар бекітіліп, штаб жұмысқа кіріскен. Штаб құрамына бөлімшенің барлық басшылары кіріп, дайындық жұмыстары тұрақты бақылауға алынған.
«Қазіргі таңда теміржол инфрақұрылымына жақын 12 су қоймасы мен бөгеттер тексерілді. Су өткізу жүйелері тазартылды. 370 көпір, 778 құбыр, 230,6 шақырым кювет және ондаған шақырым су ағатын арналар ретке келтірілді»,– деді Б. Хамзин.
Тасқын суының өтуін қамтамасыз ету үшін 6 арнайы пойыз жасақталып, 32 вагон қажетті материалдармен қамтамасыз етілген. Бұған қоса, 53 нүктеде тәулік бойы кезекшілік ұйымдастырылып, байланыс пен жарық жүйелері орнатылған. Теміржол бойында су деңгейін өлшеу жұмыстары жүргізіліп, қызметкерлерге төтенше жағдай кезіндегі әрекеттер бойынша нұсқаулықтар қайта түсіндірілген. Бүгінгі таңда төніп тұрған қауіп жоқ деуге болады. Бірақ, теміржолшылар арқаны кеңге салуға әлі ерте деп қырағылықты бәсеңдетпей отыр.