Атыраудағы техникалық тексеру Құлсарыдан басталды

Атырау жүк тасымалы және магистральдық желі бөлімшелерінде 7 сәуірден көктемгі комиссиялық тексеру жұмыста ры жүре бастады. Бұған дейін құрылымдық мекемелердің өз ішінде көктемгі байқауға дайындық жасалған.

Пойыздық және маневрлік жұмыстарда ақау, өндірістік жарақат алу жағдайы, қозғалыс қауіпсіздігі, еңбек қорғау және қауіпсіздік техникасы, техникалық құралдардың жағдайы, ғимараттардың жай-күйі, абаттандырылуы, жұмысшылардың тәртібі қаралған. Көктемгі байқау барысында әдеттегідей қозғалыс қауіпсіздігін сақтау, еңбек қорғау және қауіпсіздік техникасы, техникалық құралдардың, ғимараттардың жай-күйі, байланыс, электр құралдарының жағдайы, вагондардың жайы, темір жолдың қазіргі күйі, сондай-ақ теміржолшылардың білім мен біліктілігі, жеке мәселелері, проблемалары да қаралады.  

«Комиссия мамандарымен қамтылған тексеріс арнайы локомотив арқылы жүзеге асырылады. Ең әуелі Құлсары – Мақат телімі бойынша басталып, комиссияның бір тобы Бейнеу станциясына барады. Содан кейін Мақат – Сағыз, Мақат – Атырау, Атырау – Ганюшкино, Ганюшкино – Д.Нұрпейісова, Ганюшкино – Исатай – Атырау телімдері, сондай-ақ Махамбет, Атырау, Ақжайық, Теңдік станциялары, телімдердегі жол, сигнализация, энергиямен қамту дистанциялары, вагон, локомотив деполары, т.б. қаралады. Осы жерлерде талқылау жұмыстары да жүргізіледі. Станциялар былтырғы жылы НЖС-қа берілгендіктен байқау барысында бізге зор жауапкершілік жүктеліп отыр», – дейді Атырау магистральдық желі бөлімшесі бастығының бірінші орынбасары Аманқос Жылқышиев.  

Көктемгі байқау арнайы комиссиямен осы айдың 22-не дейін белгіленіп отыр, ал айдың аяғында жалпы қорытынды жиналыс өтпек.