Маңғыстау теміржолының ардагерлері бас қосты

Маңғыстау жүк тасымалы филиалының ғимаратында Маңғыстау теміржолы ардагерлер кеңесінің кезекті отырысы өтті.  

 Зейнеттегі теміржолшылар мен қазіргі теміржолшылардың, басшылық өкілдерінің, кәсіподақ ұйымы төрағаларының басқосуында Кеңестің жұмысы жайында айтылып, түбек теміржолының кешегісі мен бүгіні сөз болды.  

 Аймақтық ардагерлер кеңесінің төрағасы Үсен Имашев Кеңестің атқарып жатқан жұмыстары жайында баяндады. Жүзеге асырылып жатқан игі шараларды атап, кейбір қолбайлау тұстарды бірлесіп шешуге шақырды. Өзге ардагерлер де ойын білдіріп, ізін басып келе жатқан буынға ақжарма тілегін жеткізді. Мекеме басшылары сөз алып ардагерлер жұмысына қолдау білдіріп, бірлесе жұмысты жандандыратындарын айтты.  

Маңғыстау магистральдық желі бөлімшесі директоры Ерназар Ізтұрғанов ардагер теміржолшылардың түбек теміржолының өркендеуі жолында сіңірген еңбегі ұмытылмайтынын атап, жылы лебізін білдірді. Мерейтойлық жасқа жеткен зейнеткерлерді құттықтап, 70, 80 жасқа толған ардагерлерді Алғыс хатпен марапаттады.  

Марапатталғандардың қай қайсысы да кезінде бар күш-жігерін осы салаға сарқи жүріп, өмірін теміржолмен байланыстырған жандар. Соның бірі Маңғыстау түбегіне Мақаттан және Маңғыстау бағытынан тартылған қос жолдың қосылған кездегі тірі куәгері, сол шақта жас жігіт болған Ази Байпақов. Жол шаруашылығында еңбек еткен ол  бүгінде сексеннің сеңгіріне шыққан Құрметті теміржолшы,  Бейнеу ауданының Құрметті азаматы. Ази ақсақал Маңғыстау теміржолының Мақат теміржолымен түйіскен сәтіндегі естеліктерді еске алып, бұрыңғы теміржолшылардың көрген бейнетін атап, қазіргі жетістіктерге қуанып отыратынын жеткізді.