Теміржолшылар қозғалыс қауіпсіздігін арттыруға бағытталған үздік жобаларын таныстырды
"Қазақстан теміржолшысы" газетінің Жамбыл облысындағы меншікті тілшісі
«Жамбыл магистральдық желі бөлімшесі» филиалында «Қозғалыс қауіпсіздігінің мәдениеті – Үздік тәжірибелер» атты екі күндік байқау-семинар ұйымдастырылды. Онда құрылымдық бөлімшелердің тың жобалары талқыланып, маңызды мәселелер көтерілді.
Іс-шараның алғашқы күнінде қатысушылар үшін оқу-тренингі ұйымдастырылып, қозғалыс қауіпсіздігі жөніндегі басқарманың сарапшысы Мақпал Ержанова «Мақсатқа жетудің 5 қадамы – SMART» тақырыбында топтық жұмыс жүргізді. Сондай-ақ конкурсқа қатысушы 4 команда үй тапсырмасы бойынша өз тораптарындағы қозғалыс қауіпсіздігін жақсартуға бағытталған «Үздік тәжірибелерін» таныстырды. Атап айтсақ, Тараз торабының «Экспресс-Тараз» командасы – «Вакумдық ажыратқыш 27,5 кВ ЖИ-ВВ-27,5(35)-2», Шудың «Сапсан» тобы – «Шу станциясындағы «Г» паркін дамыту», сарышағандық «Ақ жол» – «Сарышаған станциясындағы жұп паркін қалпына келтіру», «Түрксіб тарландары» – «РС 830 микропроцессорлық релелік қорғаныс және автоматика құрылысы» жобаларын қорғап шықты.
Жалпы семинар-байқауда ұсынылған тапсырмалар мен тақырыптар өзара тәжірибе алмасып, өндірісте кездесетін түйткілді мәселелерді талқылауға көп мүмкіндік берді. Айталық, «Қозғалыс қауіпсіздігі мәдениеті – біздің іргетасымыз» бағытындағы «Анализді дұрыс құрастыру» кейстерін талдау талабы – темір жол бойындағы қозғалыс кезінде орын алған жайттарды сараптайтын ашық пікір алаңы іспетті болды.
– Қауіпсіздік талаптарын сақтау деген – тек қана ережелерді жаттап, нұсқауларды орындау емес. Теміржол саласындағы қауіпсіздік мәдениетін қалыптастыру – әрбір қызметкердің күнделікті әдетіне, өмірлік ұстанымына айналуы тиіс. Біз әр маманға теориялық тұрғыда білімін жетілдіріп, тәжірибе жүзінде өзін сынап көруге мүмкіндік беруді мақсат тұттық. Сондықтан пойыздар қозғалысы барысында кездесетін проблемаларды тақырып ретінде таңдап, талдауға ұсындық, – дейді «Жамбыл магистральдық желі бөлімшесі» филиалының директоры Асқар Жексембиев.
Байқау жеңімпаздарын анықтау сәтінде «ҚТЖ-Жүк тасымалы» ЖШС «Жамбыл» филиалының директоры Айдын Сеитбенбетов бұл конкурс – жай ғана жарыс емес, бұл ортақ мәселелерді шешудің жаңа жолдарын іздейтін нағыз кәсіби алаңға айналғанын атап өтті. Комиссия құрамында болған «ҚТЖ» ҰК» АҚ – «Магистральдық желі дирекциясы» филиалының Инфрақұрылымдық қауіпсіздік департаменті өкілдеріне үздік команданы анықтау оңайға түскен жоқ.
Тараз, Шу, Түрксіб және Сарышаған тораптарынан құралған 4 команда да бір-біріне дес бермеді. Алайда ұпай саны бойынша алға шыққан Сарышаған торабының «Ақ жол» командасы үздік деп танылды.