Семей теміржолында кешенді жұмыс қарқын алды

Шығыстағы «Семей магистральдық желі бөлімшесі» филиалында теміржол инфрақұрылымын дамыту бағытындағы жұмыстар қызу қарқынмен жүріп жатыр. Бірнеше бағытты қамтитын кешенді шаралардың бірқатары жыл басында жоспарланып, биылғы көктемгі комиссиялық бақылау барысында айқын түрде нақтыланды.

Солардың арасында бірінші кезекте желі бойындағы инфрақұрылымдардың күрделі климаттық жағдайларға төзімділігін арттыруға бағытталған іс-шаралар кешенін жүзеге асыру жұмыстары басталды.  

– Жалпы Абай және Шығыс Қазақстан облыстарын қамтитын біздің өңір қысқы мезгілде қар үйінділерінің жоғары деңгейімен сипатталады. Бөлімше жолдарының шамамен 41%-ы қар басу қаупіне ұшырайды. Бұл дегеніміз телім бойының 467,7 шақырымнан астамы деген сөз. Яғни қатаң маусымдағы пойыз қозғалысының қауіпсіздігі мен теміржолшылардың амандығы және еңбек өнімділігін арттыру бойынша іс-шаралар легі жүзеге асырылып жатыр. Қысқа әзірлік қазірден басталды, – дейді бұл орайда НЖС-6 бөлімшесінің техникалық бөлімінің бастығы Нұрлан Бегәділов.  

Жалпы, аталмыш бағыттағы жұмыстар сонау 2010 жылдары басталса да, тек биылғы жылы айрықша назарға алынып отыр. Мәселен, байтақ желі бойының ең күрделі пайдалану учаскесі Жарма – №15 жол айрығы аралығында тіркелген екен. Мұнда қыс мезгілінде қар жамылғысының биіктігі 3-5 метрге дейін жетіп, желдің жылдамдығы 40 м/с дейін барады. Яғни желі бойында қар тоқтату нысандарын салудың маңыздылығы артуда. Семейлік теміржолшылар жаңа жоба аясында жалпы ұзындығы 1 000 қума метрді құрайтын бес ойықты кеңейтуді жоспарлаған екен. Осы бағыттағы даярлық жұмыстары биылғы сәуір айының соңына қарай басталып кеткен. Ал 28 сәуірде 885 км пк 4-10 учаскесінде бұрғылау-жару жұмыстарының бірінші кезеңі сәтті жүзеге асырылды. Қазіргі таңда жоспарлы жұмыстар бөлімше басшылығының қатаң қадағалауымен жалғасып жатыр.  

Осынау жобаны іске асыру алдағы кезеңдерде жалғаса беретін болады. Кешенді жұмыстар аяқталғаннан кейін қар басу деңгейін төмендету, желі бойындағы инфрақұрылымның сапасын арттыру және қысқы кезеңде пойыздар қозғалысын қамтамасыз етудің тиімділігі артатын болады.  

Сонымен қатар желі бойындағы жазғы жұмыстар аясында дәл осы Жарма мен Жаңғызтөбе және Шар станциялары аралықтарында желі бойын қараусыз малдан қорғайтын қоршаулар салу ісі қатар жүргізілмек. НЖС-6 бөлімшесіне қарасты ПЧ-42 мен ПЧ-40 жол дистанциялары бұл шараларды да бастап кетті. Биылғы жылға дейінгі бес жыл ішінде жалпы көлемі 229 шақырым ұзындықтағы жолға иесіз жайылған малдың кіруіне жол бермеу үшін арнайы қоршаулар салынған. Ал осы жылға жолдың қос қапталын қоса алғанда жалпы көлемі 37 шақырым болатын мал қоршауын тұрғызу және 410 км қолданыстағы қоршауды күрделі жөндеуден өткізу жолға қойылып отыр.  

– «Семей магистральдық желі бөлімшесі» филиалында теміржол инфрақұрылымын дамыту бағытында ауқымды жұмыс қарастырылған. Сол себепті бірқатар жоспарлы шараларды ерте бастан қолға алдық. Биылғы жаз қарбаласқа толы болайын деп тұр. Желі бойындағы ауқымды іс-шаралардан бөлек шығыстағы жүк тасымалында жүктемесі аса ауыр тораптық Жаңа-Семей станциясында жаңғырту жұмыстары жүргізіліп, соның аясында жаңа станциялық парк салынбақ, – дейді Семей магистральдық желі бөлімшесінің жол бөлімі мамандары.