Семей магистральдық желі бөлімшесі жартыжылдықты табысты қорытындылады
Абай облысы бойынша меншікті тілші
Семей магистральдық желі бөлімшесінің теміржолшылары биылғы жартыжылдықты нәти желі жұмыстармен қорытындылады. Қызметтік саладағы барлық бағыттар бойынша оң динамика бар.
Дегенмен атқарылар шаралар легі әлі алда. Себебі жарты жыл ішінде қолға алынған жаңа бастамалар мен тың жобалардың нақты қорытындысы жыл соңында шығарылады. Жазғы жол күтімі, теміржол инфрақұрылымдарын жаңарту, әлеуметтік саладағы басымдықтар бойынша басталған барлық істер қарқын алып келеді.
– Биылғы жылы бөлімше бойынша төрт негізгі жобаға айрықша басымдық берілуде. Атап айтсақ, Бақты – Аягөз телімінің құрылысы, вокзалдар реконструкциясы, Ақсу – Жаңа-Семей учаскесі инфрақұрылымын жаңғырту және Семей қаласындағы Қарағайлы ықшам ауданынан теміржолшыларға арнап жаңа тұрғын үй кешенін салу. Негізгі күш осы бағыттарға салынуда, – дейді Семей магистральдық желі бөлімшесінің бастығы Айдын Шәукежанов.
Бөлімше директорының айтуынша, Дегелеңнен Жаңа-Семейге дейінгі аралықтағы теміржол инфрақұрылымын жаңғырту жұмыстары алдағы күзде толықтай аяқталмақ. Нәтижесінде телім бойының өткізу қабілеті заманауи техникалық шешімдерді енгізу есебінен айтарлықтай ұлғайтылатын болады. Қазіргі таңда жалпы ұзындығы 240 км теміржол бойында цифрлық автоблокировка жүйесі салынып, 5 жаңа жол айрығы пайдалануға берілген. Сонымен қатар қолданыстағы 3 бөлек пунктте қосымша қабылдау-жөнелту жолдары төселіпті.
Ал Бақты – Аягөз телімінің құрылысы қарқынды жүргізіліп жатыр. Десек те, жартыжылдықтағы жоспарлы шаралардан бөлек екінші кезектегі елеулі жобалар да кезек күтіп тұр. Мәселен, тамыз айының соңында Аягөз өңірі бойынша 12,5 км телімге күрделі жөндеу жүргізіліп, бағыттамалы бұрмалар жаңартылады. Жоспар бойынша бұл құрылысты екі ай мерзім ішінде аяқтау қажет. Оның сыртында Өскемен өңірі бойынша күшейтілген орташа жөндеу жұмыстары да бар. Қажетті ресурстар мен техникалық даярлық жұмыстары қазіргі күннен бастап пысықталуда. Бұл ретте НЖС-6 бөлімшесінің өндірістік-техникалық бөлімі мен жол бөлімінің мамандары жұмыс жүргізуде.