Жақсы теміржол вокзалын жаңарту жұмыстары аяқталды
"Қазақстан темір жолы "ҰК" АҚ Жақсы теміржол вокзалын жаңарту жұмыстарын аяқтады. Жұмыстар ҚР Көлік министрлігі мен "Самұрық-Қазына"АҚ қолдауымен Мемлекет басшысы мен Үкіметтің көлік инфрақұрылымын дамыту жөніндегі тапсырмалары шеңберінде орындалды, деп хабарлайды Rail-news.kz.
Жақсы - II типті вокзал, 1960 жылы салынған. Станция арқылы оны Астана, Алматы, Қостанай, Арқалық, Семей, Павлодар және Маңғыстаумен байланыстыратын сегіз жолаушылар пойызы өтеді.
Қайта құру жұмыстары барысында ғимараттың ауданы 203-тен 221,8 ш.м. дейін ұлғайтылды. Шатыры, қасбеті және ішкі үй-жайлары толығымен жаңартылды, сумен, кәріз жүйесімен, жылумен, электрмен жабдықтау инженерлік желілері және әлсіз ток жүйелері ауыстырылды. Ғимаратқа жаңа жиһаздар мен жабдықтар қойылды, іргелес аумақ абаттандырылды, перрон жаңартылды. Әрлеу үшін отандық өндірістің заманауи берік құрылыс материалдары пайдаланылды.
Мүмкіндігі шектеулі жолаушыларға ыңғайлы болу үшін вокзал ғимаратына кедергісіз кіруді қамтамасыз ететін сыртқы көтергіш орнатылды.
Вокзалды жаңғырту жолаушыларға қызмет көрсету сапасын арттыруға, ішінде отырғанда неғұрлым қолайлы жағдай болуына септік етіп, объектінің заманауи талаптарға сәйкестігін қамтамасыз етуге мүмкіндік береді.
Жаңарту жұмыстарын "Қазақстан темір жолы "ҰК" АҚ өз қаражаты есебінен орындады. Сонымен қатар компания жаңа желілер салуды, магистральдық желіні жаңғыртуды, локомотив және вагон парктерін жаңартуды, сондай-ақ заманауи цифрлық технологияларды енгізуді қамтитын теміржол инфрақұрылымын дамытудың ауқымды бағдарламасын іске асыруда.