Жас теміржолшылар Абай еліне рухани саяхат жасады
Абай облысы бойынша меншікті тілші
Семейлік белсенді теміржолшы жастар аймақта өтіп жатқан рухани-мәдени іс-шаралардың да бел ортасынан табылуда. Мәселен жуырда бір топ жас буын сала қызметкерлері облыс көлемінде бастау алған «Абай оқулары» атты тағылымы мол республикалық фестивальге қатысты.
Абай Құнанбайұлының туған күні қарсаңында ұйымдастырылған байрақты жиынға республиканың әр түкпірінен меймандар келді. Теміржолшы жастар да бұл фестивальге қонақ ретінде шақырылған.
Әуелгі кезекте Семей қаласында орналасқан Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығында республикалық «Абай оқулары» жобасының салтанатты ашылу рәсімі өтті. Семей магистральдық желі бөлімшесі мен Семей ЖТ бөлімшесі филиалының жастары да барша көпшілікпен бірге символдық мәні зор «Абай және ұлдары» ескерткішіне гүл шоқтарын қойып, даналыққа тағзым етті.
Сонымен қатар олар хакімнің мемориалдық музей-үйін тамашалап, ақын өмір сүрген дәуірдің бірегей тарихи-мәдени және құнды жәдігерлерімен танысты. Содан соң теміржолшылар «Абайдың даналық ой-толғамдары» атты мән-мағынасы ерекше форматтағы дәріске қатысты. Онда жастар қауымы хакім мұрасы жайлы бұрын-соңды айтылмаған тың деректерге қанығып, пікір алмасты.
– Өзім Абай туып-өскен Шыңғыстау топырағының ұланымын. Хакім өлеңдері мен қарасөздерін бала кезден жаттап, санаға сіңіріп өстік. Әйтсе де, қазіргі Тәуелсіздік таңында ақын мұралары жаңаша таныстырылып, соны қырынан қарастырылуда. Сол себепті де бүгінгі «Абай оқулары» фестивалінен түйеріміз көп болды. Абай өсиеттері мен жастарға берер кеңесі – ой көзімен қарасаңыз ақылдың сарқылмас кені. Ендігі аралықта біз үшін хакім Абай, қазіргі тілмен айтқанда нағыз коуч-мотиватордың өзі болмақ. Теміржолшы жастар бүгінгі шарадан осындай ой түйдік, – дейді бұл орайда теміржолшыларды бастап келген ұлттық компания бойынша өткізілген «Еңбек адамы - 2025» номинациясының иегері, Семей станциясының аға вагондардың жүру жылдамдығын реттеуші Асан Құрманғалиев.
Ал, фестивальдің екінші күні қыз-жігіттер Семей-Бөрілі-Жидебай бағыты бойынша көшпелі экскурсияға шығып, қастерлі орындарға зиярат етті.
