Қостанай облысында ескі ғимаратты бөлшектегеннен кейін Железорудная станциясының жаңа вокзалы ашылды
Қостанай облысында Железорудная станциясының теміржол вокзалын қайта жаңарту аяқталды. 1959 жылы салынған вокзал толығымен жаңартылды. Қайта құру барысында бұрынғы ғимарат бөлшектеліп, оның орнына ауданы 416,1 шаршы метр жаңа бір қабатты вокзал салынды, деп хабарлайдыRail-news.kz.
Жоба аясында инженерлік желілер жаңартылып, іргелес аумақ абаттандырылды, эвакуациялық шығу жолдары жабдықталып, заманауи жиһаздар мен жабдықтар орнатылды.
Вокзал күн сайын орта есеппен 452 жолаушыға қызмет көрсетеді. Станция арқылы Алматы, Шу, Қостанай, Атырау, Ақтөбе, Орал, Астана, Көкшетау және Бурабай курорттарымен қатынайтын 12 жолаушылар пойызы өтеді.
Қайта жаңарту Қазақстан Республикасы Үкіметінің, Көлік министрлігінің, Қостанай облысы әкімдігінің және «Самұрық-Қазына» АҚ қолдауымен Мемлекет басшысының тапсырмасын орындау үшін теміржол инфрақұрылымын жаңғырту бағдарламасы шеңберінде орындалды. Жоба «ҚТЖ» ҰК» АҚ өз қаражаты есебінен іске асырылды.
Жаңа вокзал жолаушыларға ыңғайлы жағдай жасай отырып, қауіпсіздіктің, қол жетімділіктің және жайлылықтың заманауи талаптарына сәйкес келеді.
