Қарағанды облысында екі теміржол вокзалын қайта жаңарту аяқталды
Қарағанды облысында Мойынты және Ақадыр теміржол вокзалдарын қайта жаңарту аяқталды, деп хабарлайды Rail-news.kz.
Соның барысында екі вокзалда шатырды монтаждау, ғимараттарды сыртқы және ішкі әрлеу, кәріз, сумен, жылумен және электрмен жабдықтаудың инженерлік желілерін жаңғырту, перрондарды қайта жаңарту және іргелес аумақты абаттандыру орындалды.
Қайта жаңарту Қазақстан Республикасы Үкіметінің, Көлік министрлігінің, Қарағанды облысы әкімдігінің және «Самұрық-Қазына» АҚ қолдауымен Мемлекет басшысының тапсырмасын орындау мақсатында теміржол инфрақұрылымын жаңғырту бағдарламасы шеңберінде жүргізілді. Жоба «ҚТЖ» ҰК» АҚ өз қаражаты есебінен іске асырылды.
Вокзалдар заманауи жиһазбен және жабдықтармен жабдықталған. Әрлеу кезінде қазақстандық өндірістің берік, өртке төзімді материалдары пайдаланылды, сондай-ақ өрт қауіпсіздігі талаптарына сәйкес жаңа эвакуациялық шығулар жабдықталды. 1936 жылы салынған Мойынты вокзалы 862,36 шаршы метрлік жертөлесі бар екі қабатты ғимаратты сақтай отырып қайта құрылды. Вокзал 1 типке жатады. Орташа тәуліктік жолаушылар ағыны 191 адамды құрайды. Станция арқылы күн сайын Астана, Қарағанды, Балқаш, Семей, Көкшетау, Қызылорда, Шымкент, Түркістан, Тараз, Достық, Қостанай, Павлодар және Петропавл қалаларымен, сондай-ақ Ресей және Қырғызстанмен қатынайтын 34 жолаушылар пойызы өтеді.
1936 жылы салынған Ақадыр вокзалы 595,4 шаршы метрлік бір қабатты ғимаратты сақтай отырып қайта құрылды. Вокзал III класқа жатады. Орташа тәуліктік жолаушылар ағыны 305 адамды құрайды. Станция арқылы күн сайын Астана, Алматы, Қарағанды, Тараз, Шымкент, Түркістан, Павлодар, Қостанай, Көкшетау, Бурабай курорты, Петропавл, Семей және Аягөз, сондай-ақ Ресей мен Қырғызстанмен қатынауды қамтамасыз ететін 38 жолаушылар пойызы өтеді.
Вокзалдарды жаңарту елдің 124 теміржол вокзалын жаңғыртудың ауқымды бағдарламасының бөлігі болып табылады.
Жолаушылар инфрақұрылымын дәйекті жаңарту Көліктік қызмет көрсету сапасын арттыруға, өңірлерді дамытуға және Қазақстан тұрғындары мен қонақтары үшін қолайлы жағдайлар жасауға бағытталған.
