Аягөздің абыройлы азаматы

Қазақ теміржолының арғы-бергі тарихында Аягөз өңірінің өзіндік орны бар. Себебі Түрксіб құрылысымен бірге өркендеген бұл аймақта әр кезеңдерде зор жетістіктерге жеткен даңқты теміржолшылардың шоғыры мол. Бүгінгі күнде де ісімен үлгі, еңбегімен елеулі болып жүрген майталман мамандар қатары жетерлік.

Солардың бірі – Аягөз белгі беру және байланыс дистанциясының электрмеханигі әрі осы өңірдегі Жүзағаш станциясының бастығы қызметін қоса атқаратын Мұрат Хаджиакпаров екені анық.

Мұрат Рахметоллаұлы Ақтоғай мен Аягөз арасындағы шағын ғана Жүзағаш бекетінде 45 жыл жолшы болған әкесінің тәрбиесін көріп, тәлімін алған.1985 жылы ШЧ-30 мекемесінде СОБ электрмонтері болып еңбек жолын бастаған кезден бері аттай қырық жыл өтіпті. Бүгінгі таңда дистанциясының электрмеханигі және Жүзағаш станциясының басшысы қызметін де қатар атқарып жүр. Яғни міндет те екі еселенген деген сөз.

– Менің қарауымда желі бойындағы 8 бағыттамалы бұрма, 11 бағдаршам, 6 релелік шкаф, 11 батареялық шкаф, бір жол өткелі бар. Негізгі міндет – СОБ құрылғылары, бағыттамалы бұрмалар мен байланыс желілері назардан тыс қалмауы керек. Оның сыртында басшылық тарапынан жүктелетін кезек күттірмес шұғыл тапсырмалар тағы бар. Жалпы, маған қарасты телім бөлігі өте күрделі. Уақытпен еш санаспай, еңбек етіп қана қозғалыс қауіпсіздігін қамтамасыз етеміз, – дейді байланыс саласының білгірі Мұрат Рахметоллаұлы.

Аталмыш айырма пункттің күрделі болуының тағы бір себебі, дәл іргедегі төрт бағытқа қызмет көрсететін Ақтоғай станциясындағы пойыздарды қабылдап алу, жөнелтудің жиілігі болып отыр. Ал Жүзағаш станциясы Семей магистральдық желі бөлімшесінің күнгейдегі ең шеткі нүктесі саналады. Сол себепті де тәулік бойы жүк және жолаушылар пойыздарын Алматы бөлімшесіне өткізу қажет. Ал төрт тараптан жылжымалы құрамдарды қабылдайтын Ақтоғай станциясы кейбір күндерде желі бойының босамауына байланысты пойыздарды қабылдамаса, барлығы Жүзағашқа жиналып қалады. Мұндай жайттардың басы-қасында, диспетчерлермен байланыста әлбетте Мұрат Рахметоллаұлы жүреді. Жылжымалы құрамдар әсте іркілмеуі тиіс.

Бүгінде Семей магистральдық желі бөлімшесі бойынша жол күтімі мен желі бойындағы байланыс құрылғылары қызметін жаңғырту ісіне кеңінен ден қойылған. Сол себепті де Ақтоғай мен Аягөз станциялары аралығында жолаушылар пойызы сағатына 140 шақырымда жүйтки алады. Мұның барлығы Мұрат Рахметоллаұлы бастаған жүзағаштық теміржолшылардың еселі еңбегінің нәтижесі екендігі анық. Себебі бүгінге дейін пойыз қозғалысының қауіпсіздігін арттыру мақсатында бағдарламалық және аппараттық кешендер біршама жаңартылған болатын.Тәжірибелі электромеханик ретінде желі бойындағы байланыс жүйелерін жаңғырту ісінде кейіпкеріміз де маңызды үлес қоса білді. Осы жылдар аралығында ескірген жабдықтарды заманауи үлгідегі жаңа цифрлық және микропроцессорлық жүйелерге ауыстыру шараларының бел ортасында жүрді. Байланыс саласын жаңғыртуға құрылғы-жабдықтарды монтаждау, реттеу және іске қосу жұмыстарына белсенді түрде қатысты.

Ал қазіргі күні станция басшылығында жүріп жаңғыртылған СОБ жүйелерінің ақаусыз жұмыс істеуіне техникалық бақылау жүргізіп, ағымдағы және күрделі жөндеу жүргізу жұмыстарына да жетекшілік етуде. Жел өтіндегі желі бойында жүріп ерлікке пара-пар еңбек ететін салалық қызметтің қара нарына қандай құрмет көрсетсе де артық емес.