Ақтөбеде үздік теміржолшылар марапатталды

Ақтөбелік теміржолшылар кәсіби мерекені салтанатты жағдайда атап өтті.

Жолшы, байланысшы, машинист, жолсерік, тағысын тағы өндірістің алдыңғы шебінде жүрген үздіктер марапатталып, саланың дамуына үлес қосып жүрген жас мамандар да лайықты бағасын алды. Ақтөбе магистральдық желі бөлімшесінің басшысы Бөріхан Беркімбаев қызметтік іссапармен Орал қаласындағы вокзалдың ашылу рәсіміне қатысқандықтан ұжымды филиалдың инженері Темірбек Елғонды құттықтады.

– Биыл бөлімше үшін ауқымды жұмыстар атқарылып жатыр. Күрделі жөндеу жұмыстарының едәуір бөлігі аяқталды. Бірқатар теміржол вокзалдары жаңғыртылып, Қандыағаш пен Әйтеке би станцияларында жұмыстар жалғасуда. Жеті разъездік пункт іске қосылып, автоблокировка жүйесін енгізу кезең-кезеңімен жүзеге асырылуда. Шалқар – Тассай учаскесіндегі негізгі жұмыстар қыркүйек айына жоспарланған. Осындай нәтижелердің барлығы – тәулікпен санаспай еңбек етіп жүрген теміржолшылардың маңдай терінің жемісі, – деді ол.  

«ҚТЖ-Жүк тасымалы» ЖШС Ақтөбе филиалының директоры Берік Досанов өндірістік көрсеткіштердің жоғары деңгейде орындалғанын атап өтті.  

– Алты айдың қорытындысы бойынша жүк айналымы жоспар дан жоғары орындалды. Жөндеу науқаны белгіленген кестеге сай жүргізілуде. Теміржолшы тек рельс пен шпалға жауап бермейді. Әр пойыздың артында мыңдаған адамның тағдыры мен қауіпсіздігі тұр. Сондықтан сіздердің уақытпен санаспайтын еңбектеріңіз ерекше құрметке лайық, – деді филиал директоры.

Салтанатты жиында Көлік министрінің бұйрығымен «Құрметті теміржолшы» белгісі сигнализация және байланыс дистанциясының (ШЧ-5) электромеханигі Нұрлан Ташқараевқа табысталды. Ал «ҚТЖ» ҰК» АҚ Басқарма төрағасының бұйрығымен «ІІІ дәрежелі Теміржол даңқы» белгісі Бершүгір жол дистанциясының участок бастығы Жәдігер Сейсенбіге табысталды. Мерекелік шарада айтылған әрбір жылы лебіз бен табысталған әрбір марапат теміржолшылардың тынымсыз еңбегіне берілген лайықты баға болды.