Мерейлі мереке, лайықты марапат

Атыраулық теміржолшылар төл мерекелерін биыл да үлкен жетістікпен қарсы алды. Өңірде тасымал тасқыны артып, соған сәйкес қаражат көлемі де мол болыпты. Биыл аймақта 5 вокзал жаңартылып, жолаушылар игілігіне ұсынылды.

Жолдар күрделі және орташа күшейтілген жөндеуден өтіп, көптеген бағыттамалы бұрмалар ауыстырылды. Қысқасы, қозғалыс қауіпсіздігін сақтауға маңыз беріліп, өндіріс саласында ілгерілеушілік бар. Мерекеге орай теміржолшыларды Атырау магистральдық желі және жүк тасымалы бөлімшелері басшылары, ардагерлер кеңесі, кәсіподақ төрағасы құттықтап, биік абырой мен мықты денсаулық, отбасы амандығын тіледі. 

Мерекеге орай көптеген теміржолшылар марапатталды. Биылғы жылы өңірден екі адам «Құрметті теміржолшы» атағына ие болды. Атырау локомотив пайдалану депосы, Ганюшкино айналым депосының тепловоз машинисі Ерлан Тарихов марапатын Астана төріне барып алса, Атырау жол дистанциясының учаске бастығы Есқали Айсаға Атырау магистральдық желі бөлішесінің бастығы Аралбай Қосымбаев табыс етті.  

Сонымен қатар жүзден аса адам: станция кезекшілері, жол жөндеуші, электрмеханик, пойыз құрастырушы, машинист, оның көмекшісі, вагон жөндеуші, кассир, жүк қабылдап-жөнелтуші, т.б. мамандар «Қазақстан темір жолы» ҰК» АҚ Басқарма төрағасының, Жүк тасымалы, магистральдық желі дирекциясы, жергілікті бөлімше басшыларының Алғыс хат, Құрмет грамоталарымен, «Үздік басшы», «Кәсібі бойынша үздік», «Адал еңбегі үшін» төсбелгілерімен марапатталды. Сондай-ақ осы салаға көп жылдар тер төге еңбек еткен бір топ сала ардагерлері мен темір жолдың абыройын арттырып жүрген спортшылардың да еңбегі еленді. Мерекелік шара әсем ән, күмбірлеген күймен көмкерілді.