Еңбек заңнамасы талқыланды
Абай облысы бойынша меншікті тілші
Шығыстағы теміржол саласы аймақтағы ең ірі еңбек ұжымына жатады. Сәйкесінше мұндағы кәсіподақ қызметі де барынша ауқымды. Аягөз локомотив пайдалану депосында «Қазтеміржолкәсіп» ҚБ бастамасымен еңбек қатынастары бойынша талқылаулар мен ақпараттық жиын өтті.
Оған ҚР Еңбек және халықты әлеуметтік қорғау министрлігі Мемлекеттік еңбек инспекциясы комитетінің Абай облысы бойынша департаменті қызметкерлері келіп, еліміздің еңбек заңнамасына енгізілген бірқатар өзгерістер жайлы ақпарат берді. Басқосуға «Қазтеміржолкәсіп» ҚБ Семей өңірі бойынша өкілі Есен Қажығұлов бастаған барлық бастауыш кәсіподақ ұйымының жетекшілері мен мүшелері қатысты.
Жиында ҚР Еңбек Кодексіне енгізілген бірқатар өзгерістер, оның ішінде жеке еңбек дауларын қарау тәртібін реттейтін 22 және 23-баптардың нормалары кеңінен түсіндірілді. Атап айтқанда, 22-баптың 16-тармағына сәйкес әр еңбеккердің жеке еңбек дауын қарау үшін алдымен келісу комиссиясына, одан кейін Кодексте белгіленген тәртіппен сотқа жүгінуге құқылы екені айтылды. Бұл орайда жиынға қатысушы теміржолшылар қауымы да көкейде жүрген сауалдарын қойып, жауап ала алды. Мысалы, қатысушылар келісу комиссиясының қызметіне қатысты сауал жолдап, еңбекті қорғау жөніндегі техникалық инспекторларды оқыту мәселесіне де мейлінше қызығушылық танытты.
Аягөз локомотив пайдалану депосы цехтық кәсіподақ комитетінің төрағасы Берік Байқоңыров айтып өткендей, қазіргі таңда ТЧЭ-25 мекемесінде жалпы саны алты жүзге жуық адам еңбек етеді. Өткір тұрған өзекті мәселелер жоқ. Жалпы, Аягөз өңірі бойынша соңғы уақыттары еңбек даулары болған емес. Мұның өзі белгіленген заң талаптары дер кезінде түсіндіріліп, толық орындалуының нәтижесі екендігі анық.